Гадаад хэргийн сайдад сахилгын шийтгэл оногдууллаа

Засгийн газар өчигдөр ээлжит бусаар хуралдаж хэд, хэдэн асуудлыг хэлэлцэж шийдвэрлэсэн юм. Тухайлбал, Гадаад хэргийн сайд Л.Пүрэвсүрэнд сахилгын шийтгэл оногдуулах асуудлыг хэлэлцэж шийдвэрлэжээ. Түүнийг танхимын зарчмаар ажиллах журмыг зөрчиж, ганцаараа цойлон ярьсан хэмээн Төрийн албаны тухай хуулийг үндэслэн цалингийн хэмжээг 3 сарын хугацаагаар 20 хувь бууруулах сахилгын шийтгэл оногдуулжээ. Түүнээс гадна Гадаад хэргийн яамны Төрийн нарийн бичгийн дарга Д.Ганхуяг, Барилга, хот байгуулалтын яамны Төрийн нарийн бичгийн дарга С.Магнайсүрэн нарт мөн цалингийн хэмжээг 3 сарын хугацаагаар 20 хувь бууруулах сахилгын шийтгэл оногдуулсан бөгөөд Гадаад хэргийн сайдын төмөр замын хувьцааг Хятадын талд шилжүүлэх тухай асуудлыг өөрийн твиттер хуудсаараа дамжуулан олон нийтэд мэдээлсэнд намынх нь нөхөд ихэд шүүмжлэлтэй хандсан юм.