ICE TOP хамтлагийн 20 жилийн ойн тоглолт төв цэнгэлдэх хүрээлэнд болно

Өнөөдөр зууны мэдээ сонины үндэсний мэдээллийн төвд Ice Top хамтлагийн 20 жилийн ойд зориулсан “Баярлалаа” тоглолтын талаар мэдээлэл хийлээ. Ice Top хамтлагийн тоглолт энэ сарын 9 буюу баасан гаригт Төв цэнгэлдэх хүрээлэн болно.

Энэхүү тоглолтын ерөнхий зохион байгуулагч, ивээн тэтгэгчээр Дэлхийн Монголчууд Глобал нийгэмлэг ажиллаж байгаа юм. Ice Top хамтлагийн  үнэнч фэнүүддээ зориулан “Үргэлж хамтдаа” уриан дор тоглолтоо зохион байгуулж байгаагаараа онцлог. Тус тоглолтонд “Click Click Boom ”, “Vanquish”, “Dijital”, зэрэг хамтлагийнхан 20 жилийн ойд зориулаад тэдний хит уран бүтээлүүдээс дуулах болно гэж тоглолтын зохион байгуулагчид хэллээ.

Ice Toр хамтлаг нь 20 жилийн ойн тоглолтондоо өөрсдийн 450-460 дуунуудаасаа сор болсон бүтээлүүдээ сонсогч фэнүүддээ хүргэнэ. Тоглолтын тасалбар өнөөдрөөс эхэлж худалдаанд гарч эхэллээ. Тасалбарын үнэ  5000 төгрөг бөгөөд VIP тасалбар 100 мянган төгрөгний үнэтэй зарагдаж байгаа юм. Тасалбарыг Ticket.mn bolon Улсын их дэлгүүр дээр байрлаж байгаа явуулын кассаар худалдаж авах боломжтой юм.

Нийслэлийн цагдаагийн газрын бие бүрэлдэхүүн тус тоглолтын аюулгүйн байдлыг хангаж ажиллахаар болсон гэж  зохион байгуулагчдийн зүгээс хэллээ. Мөн тоглолтын ерөнхий зохион байгуулагчдийн зүгээс тоглолтын тасалбар 5000 төгрөгний үнэтэйгээр худалдаалагдаж байгаа учир гар дээрээс хуурамч тасалбар худалдаж авахгүй байхыг анхааруулж байна. Учир нь  тоглолт болох өдөр тасалбарын  бар кодыг уншуулж дотогш нэвтрүүлэх учир албан ёсны тасалбар борлуулах кассаар дамжуулж авна уу гэж уламжиллаа.

Г.Нараа