Хүссэн хайраа олохын тулд одооноос өөрийгөө бэлтгэ бүсгүй минь

Бүсгүй хүн бүр мундаг залуутай гэрлэхийг хүсдэг. Ар гэрээ асуудалгүй аваад явчихдаг, буурь суурьтай жинхэнэ эр хүн. Харин ганц бие бүсгүй минь маргааш гэхэд л чиний хүссэн тэр залуу яг тэр чигээрээ дэргэд чинь гараад ирвэл чи яах вэ? Чи гайхалтай хайрыг бүтээж, энэ миний хайртай хүн гээд бусдад бардам танилцуулахдаа итгэлтэй байж чадах уу? Чи түүний дэргэд өөрийнхөөрөө байж чадах болов уу?

Хүн бүрийн хүсэл биелдэг. Цаг хугацаа орчин нөхцлөөрөө өөр байж болох ч энэ амьдралаас хүн бүр хүссэнээ авдаг. Тийм болохоор яг одоо чиний бодож мөрөөдөж байгаа залуу “намайг уургалаач” гэсэн тэмдэгтэйгээр чиний өмнө гарч ирэх үед чи бэлтгэлтэй байх хэрэгтэй.

1. Юуны өмнө чиний сэтгэл санаа бэлэн болов уу?

Чи шинэхэн харилцаа үүсгэж, хайрыг хүлээж авахдаа бэлэн үү? Эсвэл өнгөрсөн дэх сэтгэлийн шарх чинь эдгэлгүй, өөрийн мэдэлгүй бүх эрчүүдийг экстэйгээ харьцуулсаар яваа бол шинэ харилцаа чиний хүсэж байгаачлан аз жаргалаар дүүрэн байхгүй ч байж мэднэ. Мөрөөдлийн залуугаасаа өмнөх шархаа эдгээж өгөхийг биш аз жаргалтай, эрч хүчтэй чамайг бүтэн болгож өгөхийг л хүсэх нь зөв. Тэгэхээр чи яг одоо юу хийх хэрэгтэй вэ гэвэл өөртэйгөө ажилла. Сонирхолтой амьдармаар байвч ганцаардаад байгаа бол үүнийг ганц бие байгаадаа тохох хэрэггүй. Харин ч ганц бие байхдаа туршиж болох бүх зүйсийг хийж, өөрийгөө завгүй, эрч хүчтэй, мөрөөдөлтэй, зорилготой байлга. Найз залуутай болмоор байна гэж хүссэн мөчөөс хойш цаг хугацаа явах тусам шалгуур чинь улам “намсаж” өөрийнхөө төсөөлж мөрөөддөгөөс огт өөр нэгэнтэй, татагдаагүй хэрнээ л цагаа дэмий үрэхээр болчих магадлал өндөр. “Би түүнд сайн биш л дээ, зүгээр л тэр надад хань болдог юм. Оргүйгээс охинтой нь дээр гэдэг биз дээ” гэх мэтчилэн тайлбар хэлэхээр байдалтай байж болохгүй гэсэн үг. Яг юу гэх гээд байна вэ гэхээр би ийм залуу хүсч байна гэдэг жагсаалтаа өөртөө нэг удаа гаргаж, биччихээд л орхичих. Түүнийг хэрхэн олох талаар ч санаа зовох хэрэггүй. Бүх анхаарлаа өөртөө төвлөрүүлж, урам зоригтой бай. Өөрийгөө хөгжүүлж, амжилт өөд өгс. Хайр өөрөө чам дээр ирэх болно.

2. Чи бусдын ятгалгад автахгүй байж чадах уу?

“Магадгүй чиний үеийн найз нөхөд чинь одоо хоёр дахь хүүхдээ гаргаж, жинхэнэ гэрийн эзэгтэй нар болсоор байна. Харин чи нөгөө л ажил гэр, ажил гэр гэсэн маршруттайгаа суугаа.” – Ийм бодлыг тархиндаа тээсээр байвал чи бусдын ятгалгад маш хурдан автаж, эхний таарсан нэгэнтэйгээ л гэрлэчихэж мэднэ. Ээж чинь оройтлоо гэж, хамаатнууд чинь хүнтэй суугаагүй юу гэж асуух үед “зүгээрээ би болоогүй гэж бодож байгаа” гэсэн хэрнээ л дотроо нээрээ оройтчихож байгаа юм байх даа гэж санаа зовниж эхэлнэ. Харин үүний оронд “Найзууд маань өөрийнхөөрөө амьдралаа зохиож сайхан амьдарч байна. Би ч мөн адил. Ажлаа тараад хүссэн цагаараа гадуур зугаалах, сургалт дамжаанд суух боломж надад бий. Гэрийн эзэгтэй болохоосоо өмнө би ийм ийм ажлуудаг хийж амжуулсан байх болно” гэж бодвол бусдын ятгалгад тийм ч ихээр автаад байхгүй болно. Хэрвээ чамд ингэсэн ч тэдний зөв юм шиг санагдаад байвал “Би ганц бие амьдралын бүх САЙХНЫГ мэдэрч чадаж байгаа/чадсан билүү?” гэж өөрөөсөө асуугаарай.

3. Мөрөөдлийн залуутайгаа учрахад чи өөрөө бэлэн үү?

Чиний мөрөөдлийн залуу – “миний төлөө бүхнээ зориулдаг, боловсролтой, юм үзэж нүд тайлсан, эмэгтэй хүнийг хүндэлдэг” байх гэх мэт жагсаалт байгаа байх. Харин энэ бүх сайхан чанарыг өөртөө шингээсэн залуугийн дэргэд байхдаа чи өөртөө итгэлтэй байж чадах болов уу? Хэний ч хажууд өөрөөрөө байхаас санаа зовдоггүй, өөрийнхөө онцгой гэдэгт итгэлтэй бүсгүй чи мөн бол тун сайн хэрэг. Харин тийм байж чадна гэдэгтээ чи итгэлгүй байгаа бол хэцүү шүү дээ. Өнөө орой л нэг ресторанд найзтайгаа уулзахаар ороход чинь яг чиний хүсдэг залуу найзын чинь танил гээд хамт сууж байвал чи өөрийгөө азтай байна гээд баярлах уу, эсвэл гэнэтийн айдас төрж, түүнээс өөрийн мэдэлгүй дөлөх болов уу? Хоёр дахь хариулт л юм шиг санагдаад байвал дээр хэлсэнчлэн одооноос эхэлж өөртэйгөө ажилла бүсгүй минь. Өөрийнхөө хэн байхыг хүсдэг, ямар ямар сонирхолтой гэдгээ жагсааж бичээд эхнээс нь хэрэгжүүлж эхлээрэй. Юм үзэж нүд тайлсан залууг хүсч байгаа бол чи өөрөө бага ч гэсэн мэддэг зүйлтэй байх хэрэгтэй биш гэж үү? Боловсролтой залуугийн дэргэд чи заавал илүү байх албагүй ч наад захын зүйл мэдэхгүй байж болохгүй шүү дээ. Тэгэхээр өөрийгөө хөгжүүл, боломжийг ашиглаж, хийж чадах бүхнээ хий. Энэ явцдаа л чи өөрийгөө олох болно. Оролдож үзэхгүй байж л болохгүй юм шүү.

4. Өмнөх харилцаануудаасаа чи юу сурсан бэ?

Өмнөх бүтэлгүй харилцаанууд чамд юуг заасан бэ? Яг одоо цаас бал гаргаж байгаад бичээд үз дээ. Эрчүүд ингэж боддог юм байна, ийм үед би ингэх хэрэгтэй юм байна гэх мэт цуглуулсан туршлага чамд байж л таарна. Хэрвээ энэ талаар чи бодож байгаагүй бол яг одоо бодоод үз. Ялангуяа өөрийгөө ямар нөхцөл байдалд ямар хандлага гаргаж байснаа санаж, дүгнэлт хийгээрэй. Ингэхийн тулд эхлээд эксийнхээ нэрийг бичээд аз жаргалтай байсан үеүдээ бодож юунаас сайн сайхныг мэдэрч байснаа бич. Дараа нь хэцүү байснаа санаж юу чамд асуудал болж байсныг бичээрэй. Жижиг зүйлсийг ч орхигдуулж болохгүй шүү. Эцэст нь юу та хоёрыг салах шийдвэрт хүргэснийг бичихэд ерөнхийдөө чиний хайр дурлалын харилцаанаас юу хүсдэг чинь гараад ирнэ. Харьцуулан дүгнэлт хийж болох хэд хэдэн залуус байгаа бол бүгдийг нь гаргаарай. Тэндээс чиний ихэвчлэн ямар төрлийн залуусыг өөртөө татдаг, тийм төрлийн эрчүүд юу хүсдэг гэх мэтчилэн зүйлс гарч ирэх болно оо. За одоо гаргачихсан бол үүнээсээ суралцах цаг боллоо. Өөртөө татчихаад байдаг төрлийнхөө залуусыг чи хүсэхгүй байвал хүсэж байгаа залуу чинь ямар төрлийн эмэгтэйг сонирхох талаар бодоод үз. Одоогийн чиний байгаагаас илүү боловсролтой байх хэрэгтэй бол түүнийгээ хэрэгжүүл, суралц. Гэхдээ өөр нэг баг зүүж, дүр эсгэнэ гэсэн үг биш шүү. Ер нь хүн өөрийн байгаа орчноосоо л хайраа олж, амьдралаа зохиодог. Тиймээс чи орчноо, хүрээллээ өөрчлөх хэрэгтэй ч юм билүү?

5. Цаг хугацаа чиний талд байгаа гэдгийг үргэлж санаарай

Дээр дурдсан 3 зүйлээс хамааралгүйгээр яг одоо чамд болзоот залуу байгаа бол түүнтэй гүнзгий харилцаа үүсгэх гэж эсвэл харилцаагаа шуудхан таслах гэж битгий яараарай. Амжилттай тогтвортой харилцааг хүсэж л байгаа бол шүү дээ. Тэр чамд таалагдлаа гээд сайхан харилцаа үүсч, тэр чамд таалагдахгүй байлаа гээд авах юмгүй байна гэж байхгүй. Зүгээр л цаг хугацаанд бүхнийг даатгаад ажиглаад үз. Магадгүй түүний дотор эрдэнэсийн авдар нуугдаж байгаа ч юм билүү? Бас магадгүй чамд бусдын гэрлэдэг хугацаанаас жаахан оройтчихвол романтик байж чадахгүй юм шиг, романтик зүйл хүсэхэээ больчих юм шиг санагдаж байж болох юм. Жинхэнэ хайртайгаа оройтож учирлаа гээд дур булаам, тачаангуй байхаа болино гэсэн үг биш. Хүсэл тэмүүлэл чинь байж л байвал чи хэзээд дур булаам байж, романтик зүйлсийг таалдаг хэвээр байх болно. Жинхэнэ хайраа олоход хэзээ ч оройтдоггүй. Тиймээс дээрх алхамуудыг туршиж үзээд, цаг хугацаа чиний талд гэдгийг үргэлж санаж яваарай. Оройтлоо гээд яаран шийдвэр гаргаж буруу сонголт хийж болох учраас яаралгүй шийдвэр гаргаарай.

6. Эцэст нь аз жаргал бүхлээрээ чинийх гэдэгт эргэлзэлгүй итгээрэй

Одоо чи хаана байгаа нь чухал биш хаашаа, хэрхэн явж байгаа чинь л чухал учраас одоо ганц бие байгаадаа тэгтэл санаа зовох хэрэггүй. Харин амьдралаа эерэг талаас нь харж ганц бие байсан ч хэрхэн илүү сайхнаар амьдарч болох тухай, хэв маягаа ухаалаг болгох талаар л бодоорой. Аз жаргалтай хүнд л илүү их аз жаргал ирдэг юм.

 

 

everyday.mn