Өглөө.мн Шинэ өглөө, Шинэ мэдээлэл
Хүүхэд өсөхийн хирээр хүүхдийн өсөлт, хөгжилтийг эхийн хөхний сүү дангаар хангах боломжгүй, нөгөө талаар хүүхдийн биед зайлшгүй шаардлагатай төрөл бүрийн аминдэм, эрдэс, тэжээлийн бодисуудын хэрэгцээг хангаж чадахгүй тул хүүхдэд илчлэг, тэжээллэг хоол нэмэгдлээр өгөх шаардлагатай болдог.
Нэмэгдэл хоолыг хэрхэн бэлтгэж өгөх вэ?
Ээж, асран хамгаалагч нар гэрийн нөхцөлд өөрийн нөөц бололцоонд түшиглэн нэмэгдэл хоол бэлтгэхдээ юуг анхаарах вэ?
– хоолыг эхний үед зутан, нухаш хэлбэрээр бэлтгэх, аажимдаа нухаш, жижиглэж хэрчсэн байдлаар бэлтгэж өгөх
– өдөрт аль болох олон нэр төрлийн хоолыг бэлтгэн өгч өдөр бүр өөр өөр хоол өгөх
– хярж хэрчсэн буюу 2-3 дахин машиндсан махтай, ногоотой бантан, сүүтэй ногооны зутанг өгөхөөс гадна аль болох олон төрлийн хүнсний бүтээгдэхүүн /сүү, цагаан идээ, ногоо, жимс, төрөл бүрийн будаа/ оролцуулсан хоол өгөх
– бага насны хүүхдэд өдөр бүр тогтмол 2-3 удаа тусгайлан бэлтгэсэн хоолыг өгөх нь зүйтэй
– хоолыг тухай бүрт нь шинээр бэлтгэж өгөх
– хүүхдэд нэг удаад 250-300 гр хоол өгөх ба хөхөө хөхдөг бол өдөрт 3 удаа, хөхнөөс гарсан бол 5 удаа хооллох
– хүүхдийг хооллоход эх, асран хамгаалагч идэвхитэй туслаж аяга халбагаар зөв хооллож сургах
Хүүхдийг нэмэгдэл хоолонд оруулахад юуг анхаарах вэ?
Нэмэгдэл хоолыг эхний өдөрт хөхөө хөхүүлсэний дөрөө 2-3 жижиг халбагыг өгч, дараагийн өдөр 5-6 халбага болгон өдөр өдөрөөр нэмэгдүүлж хүүхдийн идэх хэмжээнд хүртэл өгнө. Тухайн хоолонд дассаны дараа дараагийн шинэ хоолыг дасгаж өгнө.
Та хүүхдээ өдөрт ямар хоолоор хэдэн удаа хооллох вэ?
Жишээ болгож нэг өдрийн хооллолтыг үзүүлбэл:
6 сартайгаас 12 сартайд 3-4 удаа хооллох
9 цагт: хүүхдийн будааны агшаамал 200мл
12 цагт: 2-3 дахин машиндсан махтай, ногоотой бантан 150 мл, алимны шүүсийг 1/3 -д буцалсан усаар шингэлсэн 50 мл
16 цагт: ногооны зутан 200 мл
20 цагт: тараг /ургамлын тос, чихэртэй/
хооллолтын хооронд хөхийг хүссэн үед хөхүүлэх
1-3 настайд 5 удаа хооллох
9 цагт: тэжээллэг зутан 1 аяга, 1 ширхэг жигнэмэг
12 цагт: элэгний нухаш ½ аяга, төмс, луувангийн нухаш 4-5 амны хоолны халбага, алимны /жимсний/ шүүс 6-8 амны хоолны халбагаар өгнө
15 цагт: хярам нэг аяга, боов, боорцог, 50 гр орчим жимсний нухаш
18 цагт: гэрийн хоолноос 1 аяга /гэрийн хоолноос шүүж хийгээд хүүхдийг идэж чадахуйцаар аяганд жижиглэж/ өгнө
21 цагт: тараг, аарц, сүүний аль нэгийг 1 аяга өгнө.
Нийгмийн эрүүл мэндийн хүрээлэн
