Өглөө.мн Шинэ өглөө, Шинэ мэдээлэл
Бүгд Найрамдах Өмнөд Судан Улсад үүрэг гүйцэтгэж буй Монгол Улсын Зэвсэгт хүчний 10 дугаар ээлжийн мотобуудлагын батальоны холын эргүүлийн 3 дугаар ээлжийн бүлэг “Юнити” секторын “Маёом” сууринд 2021 оны 03 дугаар сарын 28-ны өдрөөс үүрэг гүйцэтгэж байна.
Тус эргүүлийн бүлгийн үүрэг гүйцэтгэж байгаа бүс нутагт хуурай, халууны улирал дуусаж буйтай холбоотойгоор орон нутгийн зэвсэгт бүлэглэлүүдийн үйл ажиллагаа идэвхжиж, малын хулгай, дээрэм зэрэг гэмт хэргийн гаралт нэмэгдэн, цагийн байдал хурцдаж, орон нутгийн иргэдэд болзошгүй аюул заналхийлсээр байгаа юм.
Тухайлбал, энэ сарын сарын 03-ний шөнө “Маёом” сууринаас 20 гаруй километрт орших “Боуда” тосгонд зэвсэглэсэн этгээдүүд үхэр хулгайлах зорилгоор иргэд рүү халдлага үйлдэж, буудалцаан боллоо. Энэ үеэр зэвсэгт дээрэмчдээс дөрөв, халдлагад өртсөн энгийн иргэдээс 23, нийт 27 хүний амь үрэгдэж, 25 хүн шархадсан байна. Шархадсан иргэдийн ихэнх нь 6-22 насны хүүхэд, эмэгтэйчүүд ажээ.
Ойролцоох нутагт халдлага гарсантай холбогдуулан эргүүлийн үүрэг гүйцэтгэж байсан Монгол Улсын Зэвсэгт хүчний алба хаагчид тухайн хэргийн газар цаг алдалгүй очиж, орон нутгийн эмч нартай хамтран шархадсан иргэдэд эмнэлгийн анхан шатны тусламж үзүүлэн, “Манкиен” суурин дахь Хүмүүнлэгийн эмнэлэг рүү яаралтай зөөвөрлөсөн юм.
Ташрамд дуулгахад, олон иргэний амь насыг хохироосон зэвсэгт дээрэмчдийн эсрэг болон хулгайлагдсан 9500 үхрээ буцаан авахаар 5000 гаруй орон нутгийн иргэд тухайн бүс нутагт цуглараад байгаа тухай албан бус мэдээлэл байна.
Эмнэлгийн яаралтай тусламж болон шархтан татан гаргах ажиллагааг богино хугацаанд зохион байгуулж, олон хүний амь нас, эрүүл мэндийг авран хамгаалсан монгол цэргүүдэд “Маёом” суурины дарга Хон Жеймс Чуол Гатлуак “Цагийн байдлын тогтворгүй энэ үед манай сууринд холын эргүүлийн үүрэг гүйцэтгэж байхдаа олон иргэдийн амь нас, аюулгүй байдлыг хангахад томоохон дэмжлэг үзүүлсэнд баярлалаа” хэмээн талархал илэрхийлсэн юм.
Ахлах дэслэгч Г.Цэрэннадмид
