Монголын театрын музей “Агуй 02” нэртэй угсаатны хөгжим, язгуур урлагийн тоглолтын танхимтай боллоо

Монголын театрын музей “Агуй 02” нэртэй угсаатны хөгжим, язгуур урлагийн тоглолтын танхимтай боллоо

Агуйн орчинд эртний дуу хөгжмийг сонордуулах “Агуй о2” төсөл нь Соёлын яамны “Байгальд ээлтэй Монгол соёл”, Орчны бохирдлыг бууруулах үндэсний хөтөлбөр, “Сонгодог урлаг 3” арга хэмжээний хүрээнд соёл урлагаар дамжуулан нөлөөллийн төсөл, арга хэмжээг дэмжин ажиллаж байна.

Угсаатны хөгжим судлаач Д.Ганпүрэвийн санаачлагаар Монголын Театрын Музейн өв соёлын танхимыг 2020-2021 оны хооронд засварлаж Агуй О2 орчинг бүрдүүлж аялал жуулчлалын үйл ажиллагаанд зориулсан соёл урлагийн онцгой бүтээгдэхүүн болсноороо онцлогтой юм.

Агуй O2 нь агуйн хүчилтөрөгч мөн боловч нэршлийнхээ утгын хувьд угсаатныг бүтээж буй бүхий л биет бус соёлыг хүчилтөрөгчтэй зүйрлэн нэрлэсэн ба Аудиториум нь сонсох, үзэх боломжийг үзэгчдэд олгох зорилгоор бүтээгдсэн дэлгэц, дуу авианы цогц шийдэл бүхий танхим юм.

Агуйн акустик давтамж нь тодорхой бүтэцтэй байдаг ба түүнийг дуу авианы тогтвортой давтамж мөн болохыг таньж эхэлснээр байгалийн дуу чимээ, шуугианаас авиаг ялгах чадвар хүнд үүссэн. Энэ нь өвөг угсаатны хэл соёл, эгшиглэгээний язгуур үүсэх үйл явцыг хөгжүүлсэн.

Угсаатны хөгжим судлаач Д.Ганпүрэв хэлэхдээ, “Хөгжим бол хүний үүсэл хөгжилтэй холбоотой хүний дотоод давтамжийн биет илрэл юм. Дэлхий дээрх хамгийн эртний архео хөгжмийн зэмсэг нь 60.000 жилийн өмнө үүссэн. Байгалийн хуулиудыг танин мэдэх замаар ертөнцийн тухай судалдаг шинжлэх ухааныг “Байгалийн шинжлэх ухаан” гэдэг.

Түүнд хөгжим, музей хамаарах ба энэ нь байгалийн шинжлэх ухааны оролцоотойгоор угсаатны соёл болон дуу хөгжмийн соёлыг шинжлэн судлах үйл явц бөгөөд түүнийг зөвхөн АГУЙ о2 – auditorium-аас сонордож болно” гэлээ.