Зам ашигласны хураамжийг хууль бус гэдгийг тогтоожээ

Монголын жолооч нарын эрх ашгийг хамгаалах холбооноос Нийслэлийн иргэдийн төлөөлөгчдийн хурлын тогтоол хууль зөрчиж байгаа талаар мэдэгдлээ. Тодруулбал, НИТХ-ын тогтоолоор “Нийслэлийн автозам, замын байгууламжаар зорчиж буй тээврийн хэрэгслээс төлбөр авах журам”-ыг баталсан. Энэ журмын хүрээнд нийслэлд бүртгэлтэй тээврийн хэрэгслээс, мөн хөдөө орон нутгаас шалган бүртгэх товчоодоор дамжуулан хот руу нэвтрэх орон нутгийн дугаартай тээврийн хэрэгслээс зам ашигласны хураамж авдаг болсон. Түүний төлбөрийн хувь хэмжээг тогтоосон НИТХ-ын тогтоол нь хууль зөрчсөн болохыг Захиргааны хэргийн анхан шатны шүүхээр тогтоосон байна. Гэвч хууль зөрчсөнийг тогтоосоор байтал НИТХ 2015 оны төсөв батлахдаа уг асуудлаар дахин шийдвэр гаргаж 10.6 тэрбум төгрөгийг хураахаар шийдвэрлэсэн байна. Үүнийг тус холбооноос эсэргүүцэж буйгаа мэдэгдсэн юм. Мөн сүүлийн үед жолооч нарын эрх ашиг ихээр зөрчигдөж байгааг шүүмжилсэн . Ялангуяа автомашиныг эзэнд нь мэдэгдэлгүйгээр ачих нь хүний өмчид бүдүүлгээр хандаж байгаа явдал гэж Монголын жолооч нарын эрх ашгийг хамгаалах холбооныхон онцлов.

М.ЭНХ