Инженерийн шугам сүлжээний барилга байгууламжийн өмчлөлийн асуудлыг холбогдох байгууллагуудад хүлээлгэн өгнө

Дархан-Уул аймгийн хэмжээнд ашиглагдаж байгаа инженерийн шугам сүлжээний барилга байгууламжийн өмчлөлийн асуудлыг судалж шийдвэрлэх чиг, үүрэг бүхий аймгийн Засаг даргын үйлдвэрлэл, дэд бүтэц, хот төлөвлөлтийн асуудал хариуцсан орлогч Т.Ганболдоор ахлуулсан ажлын хэсэг өчигдөр буюу 10 дугаар сарын 25-нд хуралдаж инженерийн шугам сүлжээний барилга байгууламжийн өмчлөлийг хэрхэн  тодорхойлох талаар хэлэлцлээ. Тус ажлын хэсэг нь энэ оны 9 дүгээр сарын 27-ны өдөр байгуулагдсан бөгөөд жилийн жилд гардаг шугам сүлжээний гэмтлийг багасгаж, доголдолгүй ажиллах бүхий л үйл ажиллагааг хангаж, засвар үйлчилгээнд хяналт тавих зорилготой юм. Манай аймгийн хувьд шинээр байгуулагдсан хорооллуудын цахилгаан, дулааны шугам сүлжээний ашиглалт, засвар үйлчилгээ зэргийг тухайн барилгын компаниуд албан ёсоор холбогдох байгууллагуудад нь хүлээлгэн өгөөгүй дутагдал байдаг байна. Түүнчлэн 1990-ээд оны үед зарим газар доорх инженерийн шугам, сүлжээг хэрэглэгчийн өмч гэж үзсэний улмаас өнөөдрийг хүртэл эзэнгүй байдаг тухай асуудлыг ч ярилцлаа.

Мөн өнөөдрийн хурлаар дэд бүтцэд холбогдсон 11, 12, 13, 25 дугаар хороолол, Үндсэн тосгон, Мангиртын инженерийн шугам сүлжээний барилга байгууламжийг хэвийн догдолгүй ажиллуулахад эн түрүүнд юуг анхаарах талаар хэлэлцсэн бөгөөд дээрх хорооллын  инженерийн шугам сүлжээний барилга байгууламжийн засвар үйлчилгээ, ашиглалт хамгаалалтын ажлыг “Дархан Сэлэнгийн Цахилгаан Түгээх Станц” ХК, “Дархан Дулааны Сүлжээ” ТӨХК, “Дархан Ус суваг” ХК зэрэг холбогдох байгууллагуудад хүлээлгэн өгөх шийдвэрийг гаргасан байна. Гэхдээ эдгээр мэргэжлийн байгууллагууд төрийн, хувийн, орон нутгийн өмчлөлтэй байдаг учраас орон нутгийн зүгээс Төрийн өмчийн хороонд санал тавьж асуудлаа эрх зүйн орчны хүрээнд шийдвэрлэх юм.Ийнхүү инженерийн шугам сүлжээг хувийн болон орон нутгийн өмчид хүлээлгэн өгсөнөөр иргэд, хэрэглэгчидийг найдвартай эрчим хүч, дулаанаар хангагдах  нөхцөл бүрдэнэ.

darkhan.gov.mn