Өглөө.мн Шинэ өглөө, Шинэ мэдээлэл
Монгол Улсынхаа төв цэг, цохилох зүрх нь, гал голомт нь болсон нийслэл Улаанбаатар хотын хүндэт Иргэд ээ.
Хуанлийн хуудас эргэж, шинэ оноо угтах торгон мөч ойртож байгаа энэ үед улиран одож буй оныхоо ажлыг дүгнэж, ирж байгаа жилийнхээ зорилтыг тодорхойлдог нь дэлхийн хүн зоны уламжлал билээ. Нийслэлчүүд та бүхний дэмжлэгтэйгээр улиран өнгөрч байгаа 2018 ондоо бүтээн байгуулалт, хөрөнгө оруулалтын ажлуудыг шат дараалан өрнүүлж, иргэдийнхээ амьдрах орчныг сайжруулах, ая тухтай нөхцөлийг бүрдүүлэх, тулгамдсан асуудлаа шийдвэрлэхэд онцгойлон анхаарч ажиллалаа.
Ялангуяа дэд бүтэц, хот тохижилт, боловсрол, эрүүл мэндийн салбарт бодит ахиц гаргасан жил байсан гэдгийг тодотгон хэлье. Тухайлбал, эрүүл мэндийн салбарт “Шүд, эрүү нүүрний эмнэлэг”-ийг шинээр ашиглалтад оруулаад зогсохгүй Налайх, Багахангай дүүрэгт шинэ эмнэлгийн барилгаа хүлээн авч, иргэддээ үйлчилж эхэлсэн төдийгүй нийслэлийн төсвийн хөрөнгөөр улс, нийслэлийн 6 эмнэлгийн гадна талбайг тохижуулж, авто зогсоолыг нэмэгдүүлэн, иж бүрэн тохижууллаа. Хоёр жилийн хугацаанд 18 эмнэлгийн гадна тохижилтыг нийслэлийн төсвийн хөрөнгөөр хийж чадсанаараа иргэддээ тохилог орчинд, тухтай үйлчлүүлэх боломжийг олгосон нь та бидний хамтын хүчин чармайлт юм.
Мөн 60 жилийн насжилттай Яармагийн гүүрийн шинэчлэл, өргөтгөлийн ажил бүрэн дуусч, олон түвшний огтолцол бүхий анхны гүүрэн байгууламжаа нийслэлчүүд авто замын салбарт хүлээн авлаа. Замын цагдаагийн уулзвар болон Сонголон, Баянзүрхийн гүүрийн бүтээн байгуулалтын ажил ид өрнөж байгаагийн зэрэгцээ гадна тойруугийн авто замын сүлжээ эрчимтэй хийгдэж байгааг онцлоё.
“Иргэдийн оролцоотой-Амьдрах орчныг сайжруулах жил”-ийн хүрээнд улс, нийслэлийн төсвийн хөрөнгөөр баригдах сургууль, цэцэрлэгийн 100 гаруй обьектын газар чөлөөлөлтийг 98 хувь хийж, бүтээн байгуулалтыг өрнүүлж чадлаа. Түүнчлэн “Зам чөлөөл”, “Явган зам” аяны хүрээнд иргэд, аж ахуй нэгжтэй хамтран ажилласнаар хууль бусаар хашсан 243 га газрыг нийтийн эзэмшилд эргүүлэн өглөө.
Гэр хорооллыг хөгжүүлэх шинэ бодлого төлөвлөлтийн хүрээнд агаар орчны бохирдлыг бууруулах зорилгоор Улаанбаатар хот анх удаа 200 өрх айлыг хамарсан “Сервис центр” байгуулах төслийг Чингэлтэй дүүргийн 7 хороонд хэрэгжүүлж, энэ оны эцэст ашиглалтанд оруулж байна. Ийм дэд бүтцийн төвийг 50 байршилд байгуулах шийдвэрийг Засгийн газар гаргасан юм.
2019 оны босгон дээр Нийслэл хот өргүй болж, төсвийн өмнө хүлээсэн үүргээ биелүүлж, ирэх онд хийж, хэрэгжүүлэх ажлынхаа зорилтыг ч НИТХ-аар батлууллаа.
Нийслэл хотын ажил өөдрөг, өнгөлөг, бүтэмжтэй байхад иргэн, өрх бүр, аж ахуй нэгж байгууллагуудын дэмжлэг, оролцоо чухал байдаг. Тиймээс ч та бүхэндээ талархахын ялдамд ирэх ондоо хамтдаа хотоо хөгжүүлэхийн төлөө гар нийлэн ажиллахыг хотын удирдлагын зүгээс уриалж байна.
Ирэх онд бид хөгжлийн эрчээ алдалгүй ажиллана.
Та бүхэн минь шинэ ондоо амжилт ололтоор дүүрэн, аз хиймориор өөдрөг байх болтугай.
