Налайхчууд Эх орончдын баяраа тэмдэглэн өнгөрүүллээ

2015 оны 3 сар 2 / 18 цаг 42 минут Нийгэм, Нийслэл

Налайх дүүргийн Монгол Ардын Намын хорооныхон өчигдөр Эх орончдын баяраа дүүргийн Соёл урлагийн ордонд ёслол төгөлдөр тэмдэглэн өнгөрүүллээ. Энэхүү баяртын арга хэмжээнд НИТХ-ын төлөөлөгч дүүргийн МАН-ын хорооны дарга С.Амарсайхан, Бага хурлын гишүүн Ч.Сарангэрэл, “Сэргэн мандалт” группын ерөнхийлөгч Д.Төмөрчулуун болон дүүргийн ИТХ дахь МАН-ын бүлгийн төлөөлөл оролцож, эрхэм журмын нөхөддөө хүндэтгэл үзүүлсэн юм.
Баярыг нээж дүүргийн МАН-ын хорооны дарга, Нийслэлийн ИТХ-ын төлөөлөгч С.Амарсайхан хэлсэн үгэндээ “Буурал түүхийн нугачаанд унаж босч явсан буурай хөгжилтэй Монгол улсыг нойрноос нь сэрээж харийн түрэмгийлэгчдээс чөлөөлж 1921 онд Ардын хувьсгалыг ялуулж, анх удаа Ардын эрхт Засаг байгуулан, 1924 онд Бүгд Найрамдах улсаа дэлхий дахинаа тунхаглан зарлаж, анхдугаар үндсэн хуулиа батлаж, 1961 онд НҮБ-д элсүүлж, 1990 онд тайван замаар Ардчилсан хувьсгалыг ялуулсан нь Монгол Ардын Намын үе үеийн эх орончдын түүхэнд тодоор бичигдэн мөнхрөх гавьяа билээ” хэмээн Монгол Ардын Намаас Монгол улсын хөгжилд оруулсан түүхэн хувь нэмрийг онцлон тэмдэглэсэн юм. Энэ үеэр МАН-ын болон дүүргийнхээ хөгжилд хувь нэмрээ оруулж ирсэн үе үеийн гишүүдээ МАН-ын болон салбарын шагналаар шагнагдсаныг гардуулж өглөө.
МАН-ын дээд шагнал “Тусгаар тогтнолын одон”-оор Лувсаншаравын Дамдинсүрэн, Лхагваагийн Мөнхөө, Аюушийн Цэрэн, Лүндэнгийн Цэрэнжав, Пунцагдоржийн Оюунчимэг, Калидолдойн Ризагүль, Дүгэрийн Пагам нарын 11 хүн,
МАН-ын “Тэргүүний ажилтан” цол тэмдгээр Чоёнгийн Пүрвээ, Чойнямын Туяа, Мажигийн Сүхбаатар, Гүнчигийн Даваа, Бадарчийн Лхамжав, Буриадын Оюунцэцэг нарын 16 хүн,
“Ахмад зүтгэлтэн” тэмдгээр Пүрэвжавын Оюунбилэг, Ибрагимын Гүлсэм, Алтангэрэлийн Ягаанхүү, Сангидоржийн Чимидбазар, Төмөртогоогийн Цэнд-Аюуш, Гончигдоржийн Хавчуур, Гочоогийн Оюунчимэг, Самдангийн Сүрэнхүү нарын 8 хүн,
“Эх орны төлөө” медалиар Нугамааны Малчвай, Дамбадоржийн Ургамал, Шагдарсүрэнгийн Мөнхцэцэг, Гүнрэгмаагийн Төмөрбаатар, Онхооны Сүрэнгэрэл, Базарранзадын Бадмааванчиг, Базарвайн Мурат, Цогтын Цэрэндулам нарын 10 хүн,
“Хүндэт тэмдэг”-ээр Хавалхааны Оноол, Отгонбаярын Дэвээ, Цэвэгжавын Долгормаа, Сэрдамбын Дуламсүрэн, Борхүүгийн Лувсанравдан, Цогтын Доржжүгдэр, Надмидын Хандмаа нарын 13 хүн тус тус шагнуулсан ба шагналын одон тэмдгийг ахмадуудын энгэрт нь зүүн өгч баяр хүргэв.
Мөн энэ үеэр Байгаль орчин, ногоон хөгжил, аялал жуулчлалын яамны “Тэргүүний ажилтан” цол тэмдгээр Д.Дамдинсүрэн шагнагдсаныг дүүргийн намын хорооны дарга С.Амарсайхан гардуулж өгсөн юм.
Энэ өдөр дүүргийн МАН-ын хороо Б.Шижир, Б.Ершан, Т.Оюунцэцэг, Ч.Жанчивдорж, Н.Мөнхтуул, Ц.Сүх-Эрдэнэ, С.Батболд, Р.Ганзаяа нарын найман гишүүнээр бүл нэмснийг олноо сонордуулж, тэдэнд гишүүний батлах, энгэрийн тэмдгийг гардууллаа.
Мөн нийслэлийн намын хорооны 90 жилийн ойг тохиолдуулан “Налайх дүүргийн МАН-ын байгууллагын түүхэн замнал” ном бүтээсэн давхар баярыг хийсэн юм.
Номын зохиогч, Монгол улсын гавьяат уурхайчин, доктор Л.Дамдинсүрэн журмын нөхөддөө хандан энэхүү номын бүтэц, агуулгын талаар тайлбарлахын сацуу тэрбээр дүүргийн МАН-ын байгууллагын төдийгүй Налайхын их уурхайн болон бусад байгууллагуудын талаар өгүүлсэн тус ном нь цаашдааНалайхын түүхийг судлахад эх сурвалж болно гэдгийг онцлон хэлж байлаа. Налайхын МАН-ын байгууллагын үе үеийн түүхийг өгүүлсэн гурван бүлэгтэй энэхүү номыг НИТХ-ын төлөөлөгч, дүүргийн МАН-ын хорооны дарга С.Амарсайхан ивээн тэтгэж хэвлүүлсэн байна.
Ийнхүү шагналын хуртай, номын баяраар үргэлжилсэн Налайхчуудын “Эх орончдын баяр” авьяаслаг гишүүдийнхээ дуун цэнгүүнээр өндөрлөлөө.