Өглөө.мн Шинэ өглөө, Шинэ мэдээлэл
Нийслэлийн удирдлагын зөвлөлийн ээлжит хуралдаанаар
-Улаанбаатар хотын үерийн эрсдлийн үнэлгээ ба эрсдлийн менежментийн стратегийн танилцуулга
-Улаанбаатар хотын бүсчлэлийн төлөвлөлт, инженер-геологи, хөрсний норматив үзүүлэлтийг тогтоох судалгааны ажлын тайлан
-Архивын сан хөмрөгт нөхөн бүрдүүлэлт хийх ажлын нийтлэг журмын төсөл
-Улаанбаатар хотыг шингэрүүлсэн хийгээр хангах төслийн танилцуулга асуудлыг хэлэлцлээ.
Улаанбаатар хотын үерийн эрсдэлийн тооцоог гаргажээ
Хуралдаанд “Улаанбаатар хотын үерийн эрсдэлийн үнэлгээ ба эрсдэлийн менежментийн стратегийн танилцуулга”-ын асуудлыг Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал танилцууллаа.
Улаанбаатар хотын Гамшгийн эрсдэлийн менежментийг сайржуулах төслийн удирдах нэгжийн захиалгаар Мал тариалангийн эрсдэл судлах төв ТББ, ЖЭМР ХХК, Усны Эрчим ХХК-ийн хамтарсан зөвлөх бөг Улаанбаатар хотын үерийн эрсдэлийн үнэлгээ ба эрсдэлийн менежментийн стратеги боловсруулах төслийг бэлтгэжээ. Төслийн нарийвчилсан судалгааг хотын төвийн хэсгийн 6 дүүргийн 1,2 сая хүн амьдардаг нутаг дэвсгэрт хийсэн бөгөөд барилга байгууламжийн нягтрал их болсон тул хотын төв дундуур урсдаг Сэлбэ, Улиастай, Туул голын болзошгүй үерийн хэмжээг 0,1 хувийн хангамшилтай буюу 1000 жилд нэг удаа тохиох, бусад газруудын хувьд 1 хувийн хангамшилтай буюу 100 жилд нэг удаа тохиолдох магадлалаар үерийн аюулыг үнэлсэн байна. Судалгааны дүнд Үерийн аюулын үнэлгээгээр Сэлбэ голын дээд хэсэгт, голын сав дотор хашаа байшин барьснаас үүдэн олон өрх айл болон 110 кВ-ын цахилгааны дэд станц усанд автахаар байгаа бол Сэлбэ голын Арслантай гүүр, түүний доод талын дулааны шугам бүхий явган гүүр үерийн усыг гаргах чадвар дутагдалтайгаас ихээхэн хэмжээний барилгажсан талбай усны халилтад өртөж болзошгүй байна гэсэн тооцоо гарчээ. Мөн Арслантай гүүрний үерийн усыг өнгөрүүлэх чадвар хангалтгүйгээс 0,1 хувь, 1 хувь, 2 хувийн хангамжтай үерийн ус шинэ цирк хүртэл хальж аюул учруулах магадлалтай байна гэсэн судалгаа байна.
Эдгээр болзошгүй аюулаас урьдчилан сэргийлэхийн тулд Улаанбаатар хотын үерийн эрсдэлийн менежментийн стратегийг боловсруулж, хэрэгжүүлэх шаардлагатай бөгөөд төслийн баг одоогийн мөрдөгдөж буй хууль эрх зүйн орчинд тулгуурлан эхний байдлаар стратегийн төслийг боловрууллаа. Ингэхдээ Голын сав газрыг үерийн эрсдэлээс хамгаалах, үерийн дархлаатай хот болох, үерээс хамгаалах байгууламж байгуулах, хүн амын аюулгүй байдлыг хамгаалж, зерийн эрсдэлийн санхүүжилтийг бүрэн шийдвэрлэх гэсэн таван чиглэлээр боловсруулалт хийжээ. Харин энэхүү стратегийг хэрэгжүүлэхэд 547,9 тэрбум төгрөг шаардлагатай гэдгийг ажлын хэсгээс гаргасан байна.
Нийслэлийн удирдлагын зөвлөлийн гишүүд хэлэлцээд хэрэгцээ, шаардлагатай ажлын боловсруулалтыг цаашид үргэлжлүүлэхийг үүрэг болголоо.
Нийслэлийн архивын сан хөмрөгт нөхөн бүрдүүлэлт хийх журмыг шинэчлэнэ
Хуралдаанд асуудлыг Нийслэлийн Архивын газрын дарга С.Гаваа танилцууллаа.
Архивын тухай хууль, Төрийн нууцын тухай хууль, Байгууллагын нууцын тухай хууль, Хувь хүний нууцын тухай хууль, Эрүүгийн тухай хууль, Захиргааны хариуцлагын тухай хууль, Тоон гарын үсгийн тухай хуулийг үндэслэн Нийслэлийн Засаг даргын 2006 оны 523 дугаар захирамжаар “Сан хөмрөгт нөхөн бүрдүүлэлт хийх журам”-ыг батлуулан мөрдөж байна.
Харин нийслэлийн болон байгууллагын архивын ажлын уялдаа холбоог сайжруулах, албан хаагчдын үүрэг хариуцлагыг тодорхой болгох, нөхөн бүрдүүлэлтийн ажлын чанарыг дээшлүүлэх зорилгоор тус журмыг шинэчлэх шаардлагатай болжээ. Ингэснээр нийслэлийн архивт нөхөн бүрдүүлэлт хэрхэн хийх талаар нарийвчилсан зохицуулалт байхгүй байгааг боловсронгуй болгох бөгөөд байгууллагын удирдлага болон төрийн албан хаагчдыг журмаар үүрэгжүүлэх боломжтой болно гэж үзэж байна. Мөн цахим нөхөн бүрдүүлэлт хийх чиглэлээр тодорхой зохицуулалт хийж, нөхөн бүрдүүлэлтээр ирж буй баримтын хэмжээ эрс сайжирч нэмэгдэнэ.
Нийслэлийн удирдлагын зөвлөлийн хуралдаанаар дээрх журмыг шинэчлэх төслийг дэмжиж холбогдох шийдвэрийг гаргах нь зүйтэй гэж үзлээ
Цөөн үгээр
-Хуралдаанаар Барилга хот байгуулалтын яамны захиалгаар боловсруулсан Улаанбаатар хотын бүсчлэлийн төлөвлөлт, инженер-геологи, хөрсний норматив үзүүлэлтийг тогтоох судалгааны тайлантай танилцлаа. Уг тайланг нийслэл хүлээж авах ажлыг зохион байгуулахыг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбатад үүрэг болголоо.
– Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадралын танилцуулсан Улаанбаатар хотыг шингэрүүлсэн хийгээр хангах төсөлтэй танилцлаа. Уг төслийг боловсруулах ажлыг үргэжлүүлэх үүрэг өглөө гэж Нийслэлийн ЗДТГ-ын Хэвлэл мэлдээлэл, олон нийттэй харилцах хэлтсээс мэдээллээ.
