Тибилиси Гран При тэмцээнээс 2 алт, 1 мөнгө, 3 хүрэл медаль хүртлээ

Гүрж улсын нийслэл Тибилиси хотод энэ сарын 20-22-ны өдрүүдэд жүдо бөхийн Гран При тэмцээн амжилттай болж өндөрлөлөө. Жүдо бөхийн олимпийн эрхийн оноо олгох “Гранпри” тэмцээнд 42 орны эрэгтэй 201, эмэгтэй 144 нийт 345 жүдоч хүч сорьж өрсөлдсөнөөс манай баг тамирчид амжилттай оролцож 2 алт 1 мөнгө 3 хүрэл медаль хүртлээ. Энэ амжилтаар багийн дүнгээр Монгол Улсын баг тамирчид 42 орноос хоёрдугаар байр эзэллээ.

Тэмцээнд амжилттай оролцож медаль хүртсэн тамирчид:

Эрэгтэйчүүдийн 60 кг жинд МУГТ Д. Амартүвшин хүрэл,

66 кг жинд ОУХМ Д. Төмөрхүлэг алт, 81 кг жинд ОУХМ Н. Дагвасүрэн хүрэл,

90 кг жинд ОУХМ Л. Отгонбаатар хүрэл,

эмэгтэйчүүдийн 57 кг жинд ОУХМ Д. Сумъяа алт,

63 кг жинд Ц. Мөнхзаяа мөнгөн медаль тус тус хүртлээ.

Нийт тамирчиддаа баяр хүргэж дараагийн Турк улсын Самсун хотод болох Гран При тэмцээнд нь амжилт хүсье.

Ш.Ганчимэг