Хүчит шонхор захын түрээслэгчдийн хүсэлтийг хүлээн авах боломжгүй гэв

Авто замын ачааллыг бууруулах ажлын хэсэг хуралдаж Дэнжийн мянгад байрлах Хүчит шонхор захын зарим түрээслэгчийн амралтгүй ажиллах хүсэлтийн талаар хэлэлцэв. Ажлын хэсгийнхэн “Шонхор зах  нь нийслэл хотын махны бөөний цэг учраас худалдан авагчдын бөөгнөрөл ихтэй. Үүнээс үүдэн авто замын түгжрэл байнга үүсч хөдөлгөөний аюулгүй байдалд сөргөөр  нөлөөлж, зам тээврийн осол гарах нөхцлийг бүрдүүлдэг. Тиймээс Нийслэлийн Засаг даргын томоохон зах, худалдааны төвийн ажиллах цагийн хуваарийг шинэчлэн баталсан захирамжийн дагуу Хүчит шонхор захад хамаатай хэсгийг хүчингүй болгох  боломжгүй юм. Нийслэлийн иргэдийн хүнсний бүтээгдэхүүний гол хэрэгцээг хангадаг махны бөөний цэгийн хувьд долоо хоногт нэг удаа амарч их цэвэрлэгээ, ариутгал, халдваргүйжүүлэлт хийж эрүүл ахуйн дэглэмийг сахих ёстой. Захиргааны хэргийн анхан болон давж заалдах шатны шүүхээс энэ хүсэлтийг хүлээн авах боломжгүй гэсэн шийдвэр гарсан байгаа. Нийслэлийн иргэдийн эрүүл мэндийг хамгаалж, замын түгжрэлийг бууруулах нь нэг байгууллагын эрх ашгаас илүү чухал болоод байна” гэсэн юм.