Өглөө.мн Шинэ өглөө, Шинэ мэдээлэл
Яг нэг жилийн өмнө Нөхөрлөлийн үнэ цэнэ, найз нөхдийн нандин холбоог гурван найзад тохиолдох хөгтэй, хөгжилтэй адал явдлаар харуулсан, манайдаа л Солонгосын олон ангит кинонуудыг ардаа хол орхих инээдмийн нэгэн цуврал гарч эхэлсэн нь мэдээж “Эмоци” продакшны “Гурван найз” цуврал байлаа.
Тэгвэл, энэ бүх цуврал, хөгтэй адал явдлуудын зангилааг тайлахаар “Гурван найз яасан байх нь уу” нэг ангит инээдмийн кино өчигдөр “Тэнгис” кино театрт нээлтээ хийлээ. Уг нээлт дээр Урлаг соёлын оддоос эхлээд, үе үеийн рок попын одод чуулснаас гадна, кино урлагийг дэмжигч хүүхэд, залуус ч өргөнөөр хүрэлцэн ирсэн байсан нь аргагүй “Гурван найз”-ын чансааг илтгэх биз ээ.
Харин энэ үеэр олны дундуур зүсэн байж “Эмоци” продакшны захирал Д.Түвшинтөр буюу Төөтөөгөөс амжиж авсан ярилцлагаа хүргье.
“Гурван найз”-ын адал явдлуудыг яагаад нэг ангитаар төгсгөх болсон юм бэ?
“Гурван найз” уран сайхны кино маань нийтдээ дөчин анги яваад дууссан байгаа. Гэтэл удаа ч үгүй фейсбүүк, сошиал ертөнцөөр анх нэг ангит киногоор “Гурван найз”-ын адал явдлыг үргэлжлүүлээч ээ гэсэн санал ирсэн. Энэ хүсэлтийн дагуу нэг ангит кино хийе гээд манай киноныхон сэтгэл шулуудсан.
Ингээд нэг зохиолчоор зохиолоо бичүүлсэн боловч хэд хэд дахин буцаад, сүүлдээ найруулагч Ганзо ах маань дахин сууж байж маш чамбай кино зохиол гаргаж ирсэн. Ерөнхий зохиолын гол санааг Тэмка, Оргил хоёр маань гаргаж ирсэн. Тэгээд л энэ хавраас бид хэд киноныхоо ажилд орсон доо.
– Киноныхоо энэ нэрийг, санааг нь яаж олсон бэ?
– Энэ маань өмнөх сериал дээрээ Хит болсон үг байгаа. Тийм болохоор бүгдээрээ ярилцаж байгаад дундаасаа энэ нэрийг гаргаж ирсэн.
– Ерөнхий найруулагчаар нь Ч.Ганзориг найруулагч ажилласан байгаа. Тэгвэл, кино баг нийтдээ хичнээн хүнээс бүрдсэн бэ? Нөр их хөдөлмөр шингээсэн гэдэг эрхгүй харагдаж байлаа.
– Ер нь кино бүтээхэд тэрний арын албанд ажиллаж байгаа хүмүүс л гол албыг нугалдаг шүү дээ. Тийм болохоор бид бүхэн Солонгос улсад өөрийн мэргэжлээрээ сурч боловсорсон Төөнөө гээд залуу гэрэл тавилтаар Монголд хамгийн сайн байна гэсэн шуум сонсоод тэдний багийг тав, зургаан хүнтэй нь кинондоо хамтран ажиллах санал тавьсан. Угаасаа ямар ч кинонд гэрэлтүүлэг хамгийн чухал байдаг шд.
Ер нь кинонд маань найруулагчийн баг, туслахуудын баг, гэрэлтүүлгийн баг, дууны баг, жүжигчдийн баг гээд бараг төч, тавь шахуу хүн ажилласан. Энэ дээр чинь бас зүгээр байхгүй бид бүхний кинонд өөрийн хувь нэмрээ оролцуулж байгаа хүмүүс маш их байлаа. Тэр бүх хүнээ тооцох юм бол үндсэндээ манай кино зуу гаруй хүний нөр их хөдөлмөрөөс бүтсэн байгаа.
– Кино зураг авалт хэдий хугацаанд үргэлжилсэн бэ?
– Зөвхөн зураг авалт гээд ярихад л сар гаран үргэлжилсэн. Тэгээд тэрний ард талд монтаж, эвлүүлгийн ажил гэж их ажил үлдсэн. Сүүлийн үед чинь энэ формат нь өөр болчихсон юм байна. Энэ форматнууд нь хувиргадаг барьдаг, өнгө засдаг болоогүй дууны бас шинэ техник технологи гаргаж ирсэн гээд ард тал, эвлүүлгийн ажил гэхэд л хоёр сарын хөдөлмөр орлоо.
– Тэгвэл, “Гурван найз яасан байх нь уу”-аар гурван найзын адал явдал бүр төгсчихөж байгаа хэрэг үү? Дахиад шинэ улирал ч гэх юм уу, үргэлжлэх болов уу?
– Одоо бол гарахгүй. “Гурван найз яасан байх нь уу”-аар гурван найзын адал явдал ингээд дуусч байгаа.
– Ер нь гурван найзын адал явдлын инээдмийн төрөлдөө маш сайн цуврал болсон. Тэгвэл, эндээсээ урам аваад ч гэх юм уу ахиад цуврал хийх бодол байгаа юу?
– Ер нь бол Боловсрол телевиз манай хоёрт төлөвлөчихсөн ажил их байна. Дахиад ийм сетикон төрлийн буюу олон ангит инээдмийн цуврал киног хамтдаа цааш нь үргэлжлүүлье, гэхдээ цааш нь шал өөр төрлийн, өөр утга агуулгатай кино хийе ээ гээд ярилцчихсан байгаа.
– Ингэхэд танай “Тоглож болохгүй тоглоом” хошин урлагийн тоглолт үзэгчдийн зүгээс маш өндөр үнэлгээ авч байна билээ. Тэр дундаа таныг их онцолж байсан?
– Тоглолт маань үйлдвэрчин дээр бас явж байгаа. Маш сайхан болж байна, үзэгчид маш сайхан хүлээж авч байгаа. Харин өнөөдрийн хувьд киноны нээлттэй давхцаад түр завсарлачихсан байна. Маргаашнаас авахуулаад цааш үргэлжлүүлжилнэ.
– Танай хамтлагийн тоглолтыг үзэж байхад монголын хошин урлагийн талбарт цоо шинэ үе авчирав уу гэж харагдаж байлаа?
– Ер нь болбол өөрчлөх гэж их бодож байгаа. Өшөө ч их өөрчлөнө, сонин содон юм их гаргаж ирнэ. Хүн өнөөдөр юу хүсч байна, юу үзэхийг хүсч байна, юун дээр инээж байна гэдгийг өшөө их шинэчлэнэ, задлана. Бид нар тийм л хувьсал хийхийн тулд гарч ирсэн.
