Өглөө.мн Шинэ өглөө, Шинэ мэдээлэл
“UBS” телевизийн сэтгүүлч, редактор П.Одгэрэлийг ихэнх үзэгчид “Universe best songs” наадмын хөтлөгч гэдгээр нь андахгүй мэдэх биз ээ. Өнөө цагийн чадварлаг хөтлөгч нарын тоонд зүй ёсоор тооцогддог сэтгүүлч бүсгүй маань шаггүй найрагч төдийгүй сүүлийн үед охид залуусын сонсох дуртай олон сайхан дууны шүлгийг бичсэн гэдэг. “Universe best songs” наадмын ач холбогдол, цар хүрээг нэмэгдүүлэхэд багагүй үүрэг гүйцэтгэсэн хөтлөгч П.Одгэрэл өдгөө 20 гаруй дуутай болоод байгаа аж. 2005 онд анхны шүлгийн түүврээ “Хар шилний цаана” нэртэйгээр уншигч түмэнд хүргэж байсан тэрбээр нийт бичсэн шүлгийнхээ гуравны нэг орчим хувийг шилж авсан нь тэр аж.
Харин үзэгч сонсогчдын хүртээл болоод байгаа нэлээд хэдэн хит дууных нь шүлгэнд МУГЗ, хөгжмийн зохиолч Л.Балхжав ая хийсэн нь түүний хувьд томоохон бахархал гэдгийг онцлон ярих дуртай. “Нэр хүндтэй хүнтэй нэг уран бүтээлд нэрээ дуудуулна гэдэг нэр төрийн хэрэг. Клипэн дээр ч тэр. Дууны хөгжмийг Л.Балхжав, үгийг П.Одгэрэл гээд бичсэн байхыг харахад сайхан санагддаг. Дуу гурван жигүүртэй гэдэг шүү дээ. Тэр гурван жигүүрийн нэг нь шүү гэж бодоход л сайхан, бахархах мэдрэмж төрдөг юм” хэмээн сэтгэгдлээ хуваалцсан хөтлөгч бүсгүй маань өдгөө шинэ уран бүтээлээрээ цахиур хагалж явна.
Тэрбээр жил гаруйн өмнөөс эхлэн “Хувьсал” подакшинтай хамтарч ажиллан “Зэрлэг цэцэгсийн хүлэмж” киноны дууг зохиосон нь хит дууны парадыг багагүй хугацаанд тэргүүлж, ихээхэн амжилт олсон билээ. Тэгвэл өдгөө тус продакшны шинэ бүтээл болох “Тооцоогүй тоглоом” уран сайхны киноны дууг зохиосноор өмнөх амжилтаа дахин давтаад байна. “Хүн бүр хайрынхаа үнэнч эзэн нь байх ёстой. Хайр гэдэг энэ л агуу, ариун бүхнийг цогцлоосон гэгээн ертөнцийнхөө эзэн нь байжчадвал амьдралын утга учир тэр юм” гэдгийг энэхүү дуунд өгүүлсэн нь хэн хүний сэтгэлд нийцсэн бололтой. Уг дууг “Номин талст” хамтлагийн дуучин А.Хаянхярваа, “Хувьсал” продакшны жүжигчин Г.Бямбасүрэн нар хамтран дуулсан нь чамгүй амжилт дагуулаад байна. “Тооцоогүй тоглоом” киноны гол дүрд тоглосон жүжигчин Г.Бямбасүрэнгийн хувьд, өмнө нь “Хувьсал” продакшны “Хайр” жүжгийн дууг олны танил уран бүтээлчидтэй хамтран дуулсан билээ.
