“Залуу хүн-2015” цуврал лекцийн 10 дахь зочноор Б.Бадмаа уригдлаа

Монголын Залуучуудын Холбооноос уламжлал болгон зохион явуулж ирсэн “Залуу хүн” цуврал лекцийн энэ хаврын 10 дахь буюу хамгийн сүүлчийн зочноор Мах Импэкс ХК-ийн “ХКҮ”-ийн гүйцэтгэх захирал Б.Бадмаа уригдлаа. Тэрбээр “Боломж-Ажлын гараа” сэдвийн хүрээнд илтгэл тавьж, залуустай нээлттэй ярилцлага өрнүүлэхээр болсон байна. Хүмүүнлэгийн Ухааны Их Сургуулийг олон улсын сэтгүүлч, орчуулагчийн мэргэжлээр төгссөн тэрбээр 2004-2008 онд “Өдрийн сонин”-д Спортын сэтгүүлч, 2008-2010 онд “Чингис маркет” ХХК Олон нийттэй харилцах менежер, 2010-2013 он “Мах Импэкс” ХК-ийн Маркетингийн албаны дарга, 2013-2014 он “Талх Чихэр” ХК-ийн Бодлого зохицуулалтын албаны даргын албыг тус тус хашиж байжээ. Харин одоо 70 жилийн түүхтэй Монголын Улсын Ууган үйлдвэрүүдийн нэг Мах Импэкс компанийн “ХКҮ” ХХК-ийн гүйцэтгэх захирлын үүрэгт ажлыг гүйцэтгэж байгаа юм. Спортын сэтгүүлчээс ажлын гараагаа эхэлж байсан тэрбээр 10-н жилийн хугацаанд яаж өнөөдрийн амжилтаа бататгаж, энэ оргилд хэрхэн хүрсэн талаар мэдэхийг хүсвэл залуус та бүхэн баасан гарагийн 17 цаг 37 минутад МЗХ-ны Залуус танхимд хүрэлцэн ирээрэй. Дашрамд дуулгахад энэ өдөр тус лекцийн арван дугаарт тасралтгүй хамрагдсан залууст батламжийг нь гардуулан өгөх юм.