Өглөө.мн Шинэ өглөө, Шинэ мэдээлэл
Чөлөөт бөхийн Ази тивийн аварга шалгаруулах тэмцээний эргэн тойронд
Тэмцээний 1 дэх өдөр
Катарын Доха хотноо болж буй бөхийн чөлөөт барилдааны Ази тивийн аварга шалгаруулах тэмцээний эргэн тойронд өрнөж буй мэдээллүүд Монгол түмнээ нэг бухимдуулж, дараагаар нь баярын сайхан мэдээнүүд түгсээр байна.
Монголын шигшээ багийн найман тамирчин Ази тивийн аваргыг зорьсон бөгөөд Монголын Чөлөөт бөхийн холбооны хариуцлагагүйгээс тус тэмцээний 74, 97, 125 кг-ын жингийн тамирчид болох Д.Гомбодорж, Д.Хүдэрбулга, Н.Золбоо, дасгалжуулагч Б.Баяраа нар Дубайгийн онгоцны буудлын саатуулах байрнаас нутаг буцсан.
Тэдний нутаг буцсан шалтгаан нь визаны зөрчил. Үнэн хэрэгтээ Азийн аваргад барилдах нэрсийн жагсаалтанд нэрс нь багтаагүйгээс улбаатай аж.
Тэгвэл нутаг буцсан тамирчдынхаа оронд дасгалжуулагч багш нар нь Азийн аваргын дэвжээнд зодоглолоо.
Ийм шийдвэр гаргасны учир Азийн аваргад бүтэн багаар оролцож байж Дэлхийн аварга шалгаруулах тэмцээнд бүтэн багаар оролцох эрх авах учраас тэр юм.
Өчигдөр 125 кг-ын жинд эмэгтэйчүүдийн шигшээ багийн ахлах дасгалжуулагч Б.Батбаяр зодоглож Туркменистаны бөхийг 9:6 харьцаагаар ялсан нь Монголчуудаа огшоосон хэрэг болсон.
“Хуучин бууны хугархай” гэдгээ Азийн аваргын дэвжээнд харуулж 7 дугаар байр эзэлж чадсан Б.Батбаяраар бахархахгүй байхын аргагүй.
Тэгвэл ОУХМ Эрдэнэбатын Бэхбаяр Дохагийн дэвжээнд эх орныхоо нэрийг гаргаж Ази тивийн аварга боллоо. 57 кг-ийн жинд Э.Бэхбаяр дэлхийн оюутны аварга Японы Ф.Моришитаг 5-0, Азийн АШТ-ий хүрэл медальт Энэтхэгийн Рахул Аварег 8-5, Инчон-2014 Азийн наадмын аварга Ардчилсан Солонгосын Жон Хак Жинийг 3-2, дэлхийн оюутны Универсиад наадмын дэд аварга Кыргызстаны С.Надырбек-Улуг 4-1 оноогоор ялж шар тивийн аваргаар тодорлоо.
Мөн 65 кг-д Монгол Улсын гавьяат тамирчин Г.Мандахнаран, 86 кг-д ОУХМ П.Өсөхбаатар нар хүрэл медалийн эзэд болсон.
Эмэгтэйчүүдийн 58 кг-д Э.Гантуяа мөн 7-р байрт шалгарсан амжилт үзүүлсэн билээ.
Тэмцээний 2 дахь өдөр буюу өнөөдөр
Тэгвэл тэмцээний хоёрдахь өдөр буюу өнөөдөр манай тамирчид эхний барилдаанууддаа амжилт гаргасаар байна.
Чөлөөт бөхийн 61 кг-д 15 орны шилдгүүд өрсөлдөж байна. Манай улсын тамирчин, ОУХМ Б.Номин жингийнхээ 12 дугаарыг татаж эхний даваанд Тажикийн Р.Режеповтой, дараагийн даваанд саяхан Ардчилсан Солонгосын Ким Күк Гвантай хүч үзэж 8:11-ын харьцаагаар яллаа.
70 кг-д мөн 15 бөх барилдах бөгөөд Г.Идэрхүү эхлээд БНСУ-ын Ён Хо-Жүнтэй халз тулж 7:2 оноогоор, дараагийн тойрогт барилдах Афганы тамирчин нь гэмтэлтэй гээд барилдаагүй ялалт авлаа.
Харин 74 кг-ийн жинд барилдахаар мэдүүлэг өгсөн Монголын багийн дасгалжуулагч Л.Энхбаярыг сугалаанд багтаагаагүй учраас барилдсангүй.
97 кг-д 12 бөх хүч үзэхээр сугалаа татсанаас ҮШБ-ийн ахлах дасгалжуулагч, Монгол Улсын гавьяат тамирчин Ц.Цогтбаяр 11 дугаарыг авч барилдлаа. Ид залуудаа 57 болон 63 кг-д барилдаж явсан, 44 настай тэрээр өнөөдөр эхний тойрогт Тажикистаны Р.Искандаритай барилдаж 4:14 харьцаагаар ялагдал хүлээсэн юм. Тэрбээр урьдчилсан мэдээгээр 7, 8 дугаар байр эзэлсэн таамагтай байна.
Монголынхоо тамирчдын цаашдын олимп, дэлхийн аваргын замыг нь нээлттэй байлгах гэж өдий 44 насандаа тавийн аваргад 97 кг-д сугалаа татаж, идэрхэн тамирчинтай барилдаж 4 оноо авч улсынхаа нэрийг хамгаалж чадсан Ц.Цогтбаяр гавьяатаар спортын салбарынхан болон Монгол түмэн нь бахархаж байна.
Эмэгтэй 48 кг-ийн жинд манай Ц.Бямбазаяа эхний тойрогт гоц мөргөж, улмаар Энэтхэгийн В.Винештэй дөнгөж сая барилдаж 0:8-ын харьцаагаар ялагдлаа.
Ийнхүү Монголчуудын хувьд аваргатай, хос хүрэлтэй, тамирчдынхаа өмнөөс барилдах зоригтой хүнд шийдвэртэй, спортын дэвжээнд хугараагүй ноён нуруу гэдгээ харуулсан тамирчин-дасгалжуулагчидтай, ялалтын буухиатай Азийн аваргын тэмцээн хоёр дахь өдрөө үргэлжилж байна.
Дөнгөж сая зооны аваргын төлөө А дэвжээнд манай тамирчин Г.Идэрхүү, B дэвжээнд Б.Номин нар Тажикстан, Казахстаны бөхчүүдтэй хүч үзэж ялагдал хүлээлээ.
Ийнхүү хүрэл медалийн төлөө Г.Идэрхүү, Б.Номин, 48 кг-д Ц.Бямбазаяа нар барилдахаар боллоо.
Г.Идэрхүү Кыргызстаны Э.Догдурбектай, Ц.Бямбазаяа Ази тивийн 3 удаагийн аварга, Казахстаны Т.Аманжолтой хүрэл медалийн төлөө хүч үзнэ.
Хүрэл медалийн төлөөх барилдаанууд өнөөдөр орой 00 цагаас эхлэх юм.
Барилдааны бичлэгийг доорхи линкээр үзэх боломжтой.
https://unitedworldwrestling.org/…/asian-championship-senio…
Г.Эрдэм
Эх сурвалж: www.ugluu.mn
