Гуляшны өтгөн, амттай сүмсийг хэрхэн хийдэг вэ?

Гуляш бол монголчуудын түгээмэл амтархан иддэг хоолны нэг. Гэхдээ өтгөн, амттай, шаргал сүмстэй гуляш хийж сурна гэдэг бас туршлага хэрэгтэй. Бүх төрлийн амтат гуляш хийхэд шөлийг нь хэрхэн амттай, өтгөн гаргах амархан жорыг дэлгэж байна.

Гуляш нь яг нэг төрлийн хэвшмэл жоронд баригдахгүй ба та үхрийн цул мах болон олон төрлийн хүнсний ногоо, амтлагч ашиглаж агшаасан будаа эсвэл чанасан гоймон зэрэгтэй хачирлан иддэг байгаа. Гуляш хийх үхрийн мах нь өөхгүй, булчингүй, шинэхэн цул зөөлөн мах байх тусмаа сайхан амттай болдог. Хүнсний ногооны хувьд лууван, байцаа, шар манжин, сонгино, сармис, чинжүү, майлз зэрэг өргөн хэрэглээний хүнсний ногооноос сонгон хэрэглэж болно.

1. Жижиг аяганд 1/3 цайны аяга хуурай гуриланд 1 цайны халбага паприка хийж сайтар холино.

   Үүнийгээ үмхэх хэмжээтэй хэрчиж бэлтгэсэн үхрийн өөхгүй, цул махан дээр хийж сайтар хутгаж холиорой.

   Хайруулын тавганд 2 хоолны халбага масло хийж дунд зэргийн гал дээр халааж хайлуулна. Дараа нь 2 хоолны халбага ургамлын тосыг нэмж хийгээд сайтар халаана.

   Халсан тосонд амталсан үхрийн махыг хийж бор хүрэн болтол хуурч шараарай.

   Ингээд үхрийн махыг хайруулын тавагнаас шүүж гаргасны дараа савыг угаалгүйгээр 1 хоолны халбага масло хийж хайлуулсны дараа жижиглэн хэрчсэн сармисыг хийж 1-2 минут хуурна. Дараа нь хэрчсэн сонгиныг хийж зөөлөртөл нь дахин 2 минут орчим хуураарай. Мөн энэ алхам дээр гуляшинд хийх хэрчсэн ногоонуудыг хийж 3-4 минут хуурна.

   Ингээд ус, томатны сүмс /лаазалсан/, 2-3 ширхэг жижиглэн хэрчсэн улаан лооль, лаврын навч, сой соус, сармисны ханд, давс, хар перц, шарсан махны амтлагч /бүх төрлийн байж болно/ мөн хүсвэл орегано, гоньд зэрэг амтлагч хийж сайтар хутгаж холиод дунд зэргийн гал дээр тааруулж таглаж тавиад 10-15 минут зөөлөн буцалгана.

   Үүний дараа таглааг авч галын хэмийг багасгаж зөөлөн гал дээр 20-25 минут буцалгаад галаас гаргана.

   Ийнхүү амтат өтгөн шаргал сүмстэй гуляш бэлэн боллоо. Сайхан хооллоорой.

   Эх сурвалж: www.1000jor.mn