Өглөө.мн Шинэ өглөө, Шинэ мэдээлэл
Засгийн газраас ипотекийн орон сууцны зээлийн урьдчилгаа төлбөрийг 10 хувь болгож, үлдсэн 20 хувьд баталгаа гаргахаар болсон. Энэ дагуу Засгийн газраас холбогдох журмыг батлаад байгаа. Одоогоор салбарын яам болон банкууд журмын дагуу иргэдэд 10 хувийн урьдчилгаатайгаар зээлийг олгож эхлэх бэлтгэл ажлаа хангаж байгаа юм байна. Түүнчлэн банкууд нэгдсэн байдлаар 10 хувийн урьдчилгаатай зээл олгох журмаа Сангийн яам, БХБЯ-тай хамтран боловсруулах аж. Үүний дараа 10 хувийн урьдчилгаа төлбөртэй ипотекийн зээл олгож эхлэх юм байна. Барилга, хот байгуулалтын яамнаас мэдээлж буйгаар наймдугаар сарын 1-нээс эхлэн батлагдсан журмын дагуу иргэд бага хувийн урьдчилгаа төлбөртэйгөөр ипотекийн зээлд хамрагдаж эхлэх аж.
