Өглөө.мн Шинэ өглөө, Шинэ мэдээлэл
Ардын хувьсгалын түүхт 92 жилийн ой, үндэсний их баяр наадамд зодоглох бөхчүүдийг долдугаар сарын 9,10-нд Монгол бөхийн өргөөнд 09:00-19:00 цагийн хооронд Монгол бөхийн өргөөн дээр бүртгэнэ. Бөхчүүд өөрийн биеэр цолныхоо үнэмлэхтэй ирж бүртгүүлэх бөгөөд тогтоосон хугацаанаас хоцорсон тохиолдолд наадамд барилдуулахгүй байх заалттай. Өсвөрийн 128 бөхийн барилдаанд барилдах бөхчүүдийг энэ сарын 8,9-нд 09:00-18:00 цагийн хооронд Хүүхдийн ордон дээр бүртгэнэ. Өсвөрийн барилдаанд 1997 оны нэгдүгээр сарын 1-нээс хойш төрсөн хүүхдүүд барилдах боломжтой.
Энэ жилийн баяр наадамд барилдах 512 бөх нээлтийн ажиллагааны үед талбайд гарч, ард түмэндээ хүндэтгэл үзүүлэх хуваарьтай байгаа. Талбайд 512 жижиг дарцаг хатгасан байх бөгөөд бөхчүүд цолны эрэмбээр дэвж гарч, дарцаг бүрийн ард очиж зогсон төв индэр болон баруун, зүүн зүгт харж ард түмэндээ мэхийн ёслоно.
