Авлигачдаа өршөөгөөд байвал Авлигатай тэмцэх газар гэж байхын хэрэг байна уу?

Сүүлийн өдрүүдэд хаалттай дэгээр баталсан Өршөөл үзүүлэх тухай хуулийн төсөл олон нийтийн дунд маш их шүүмжлэл дагуулаад буй.

Өдрөөс өдөрт “шоронжсон” оронд шилжээд байсан Монгол Улсын хувьд өршөөлийн хууль маш чухал хууль байсан хэдий ч эрх мэдэлтнүүд өөрсдийн талд урвуулан баталчихлаа.

Санамсаргүй байдлаар зам тээврийн осол гаргасан, анх удаа гэмт хэрэг үйлдсэн, эмэгтэйчүүд, хүүхдүүдийг өршөөх ёстойн дээр төсвийн мөнгийг гэдсээ түнтийтэл идсэн цагаан захтнуудыг өршөөж буй нь төр төрөөсөө “урваж” буй хэрэг мэт.

Учир нь АТГ-т шалгагдаж байгаа эрүүгийн хэргийн дийлэнх нь өршөөлийн хуульд хамрагдаж өршөөгдөнө гэдгийг олон эх сурвалж, хууль батлалцсан гишүүд хэлж буй.

Тэгвэл улсаас цалин авч ажиллаж байгаа бүхэл бүтэн систем болох Авлигатай тэмцэх газар гэдэг байгууллага ажиллаад хэрэг байна уу?

Нэг байгууллагын хийсэн ажил, хөөцөлдсөн зүтгэлийг нэг л өдөр хууль болгон батлаад буцаагаад “үнсэн товрог” болгодог улс Монголоос өөр байхгүй биз.

Нөгөөтэйгүүр одоогийн улс төрчид өөрсдийгөө “өршөөлгүүлэх” сайхан боломжийг бүрдүүлээд өгч буй нь энэ юм.

Олны дунд шүүмжлэл дагуулаад буй өршөөлийн хуулийг нарийн ухвал анх удаагаа болон жирэмсэн гэдэг үндэслэлээр охиноо аймшигтай тамлан хөнөөсөн эцэг, эхчүүд ч багтана гэх мэдээлэл цахим сүлжээнд өрнөж байна.

Гэвч Монгол Улсын төрийн тэргүүн айл гэрийн эзэн хүн шиг “Авилгачдыг өөгшүүлсэн хуулийг төрийн босгоор алхуулахгүй” хэмээгээд Өршөөлийн хуульд хориг тавихаа мэдэгдлээ.

Өнөөг хүртэл эцсийн найруулгыг олон нийтэд дэлгээгүй өршөөлийн хуулийг ямар “ирээдүй” хүлээж буй тэвчээртэйхэн харж суух үлдлээ, Монголчуудад

Г.Эрдэм