Нийслэлчүүд утаагүй хотын төлөө бүх нийтийн марафонд нэгдлээ /фото/

Өнгөрсөн амралтын өдөр нийслэлчүүд утаагүй  хотын төлөө, эрүүл амьдралын төлөө нэгдлээ. Энэ бол бүх нийтийн марафон гүйлт байлаа.

Улаанбаатар хотын агаар, хөрсний бохирдол олон улсын дунджаас 10 гаруй хувиар илүү гэсэн тоон судалгаа гарчээ.

Тиймээс нийслэлд ажиллаж амьдарч буй ард иргэд, аж ахуй нэгж байгууллага, оюутан залуучуудын дунд байгаль орчноо хайрлаж хамгаалах сэтгэлгээг бий болгох, нийслэл хотын агаарын бохирдол, хөрсний бохирдол замбараагүй хот төлөвлөлт нь ард иргэдийн амьдралд хэрхэн сөргөөр нөлөөлж буйг сурталчилан таниулж иргэдийн санал бодлыг нийслэлийн удирдлагуудад хүргэх, иргэдийг хөдөлгөөний дутагдлаас урьдчилан сэргийлж, эрүүл чийрэг амьдрах нөхцөлийг бүрдүүлэх зорилгоор МАХН-ын дэргэдэх “Шударга Ёсны Хувьсгалт” Үндэсний Нэгдсэн Оюутны Холбооноос бүх нийтийн марафон гүйлтийг 2015 оны 10 сарын 03-ны бямба гаригт Үндэсний цэцэрлэгт хүрээлэнд зохион байгууллаа.

Марафон гүйлтийг “УТААГҮЙ  НИЙСЛЭЛ” нэртэйгээр “Цэвэр агаар–Эрүүл амьдрал” уриан дор Шадар Сайдын Ажлын алба, ЭМСЯ, БОНХЯ, БСШУЯ, БХЯ, ХЗЯ, БХБЯ зэрэг төрийн болон төрийн бус маш олон байгууллагатай хамтран 4 км,  10 км, 21 км-ийн зайд оролцогчдыг хамрууллаа.

Ангилал тус бүрт, эрэгтэй, эмэгтэй түрүүлж ирсэн оролцогчдыг шагнаж урамшуулахаас гадна хамгийн ахмад, хамгийн залуу, хамгийн нэр хүндтэй,  хамгийн холоос ирж оролцсон, хамгийн сүүлд ирсэн гэх зэргийг харгалзан дурсгалын зүйл гардууллаа.

Уралдах замын чиглэл

А. Цэцэрлэгт хүрээлэнгийн төв хаалганы машин зам дээрээс гараанд гарч  уралдана.  300м-ийн дараа зүүн гар тийшээ эргэнэ. Дахин 150м-ийн дараа Баруун гар тийш эргэж Дүнжингаравын урдуур явсан төв замаар гүйнэ. Зай тус бүрийн тавьсан тэмдэгтийг тойрч эргэн бариа руу гүйж орно.

• 4км нь 1.900м гүйгээд эргэж Цэцэрлэгт хүрээлэнгийн усан оргилуурын урд барианд орно.
• 10км нь 4900м гүйгээд эргэж Цэцэрлэгт хүрээлэнгийн усан оргилуурын урд барианд орно.
• 21км нь 5250м гүйгээд эргэж цэцэрлэгт хүрээлэнгийн хойд машин зам дээрээс эргэж 1 тойрч ирэн Цэцэрлэгт хүрээлэнгийн усан оргилуурын урд барианд орно.

Ийм маршрутаар нийслэлийн иргэд утаагүй хотын төлөө, эрүүл амьдралын дадал хэвшлийн төлөө бүх нийтийн гүйлтэнд хамрагдаж амралтын нэг өдрийг үр дүнтэй өнгөрөөлөө. Дашрамд эл арга хэмжээнд хөгжлийн бэрхшээлтэй иргэд оролцож пара тамирчид маань богино зайнд ч мөн уралдсан юм.

“Цэвэр агаар–Эрүүл амьдрал” бүх нийтийн марафон гүйлтийн гэрэл зургаас хүргэе.

 

Гэрэл зургуудыг Г.Одонтуяа