Хэлсэн үгэндээ хүрсэн “Хүрхрээ”…

МХБХ 2015 оны үндэсний дээд лигийн тэмцээнээ хүнсний манлай үйлдвэр “Арвайн Үндэс” компанитай хамтран амжилттай зохион байгууллаа. “Арвайн Үндэс” компани хөлбөмбөгийн спортыг дэмжиж дотоодын лигийг өндөр түвшинд хүргэх хэтийн төлөвийг баримтлан улмаар 4 жилийн 500 сая төгрөгний гэрээг Монголын Хөлбөмбөгийн Холбоотой байгуулж байлаа. “Хүрхрээ” үндэсний дээд лигийн шагналын нийт сан 100 сая төгрөг бөгөөд  “Хүрхрээ 1-Р ЛИГ” тэмцээний шагналын сан 25 сая төгрөг байхаар тогтож байлаа. Ингээд энэ улирал “Хүрхрээ” дээд лигт өөрсдийн гаргасан амжилтаараа эхний гурван байрыг эзлэсэн багуудад амласан ёсоор мөнгөн шагналыг гардуулан өглөө.

Энэхүү арга хэмжээ “Арвайн Үндэс” компанийн үйлдвэр дээр өнөөдөр 10:00 цагаас эхэлсэн бөгөөд “Арвайн Үндэс” компанийн гүйцэтгэх захирал ноён О.Оргил, МХБХ-ны ерөнхийлөгч ноён А.Ганбаатар мөн МХБХ-ны ерөнхий нарийн бичгийн дарга  Ө.Шижир болон тэргүүн байр эзэлсэн багийн эзэд дасгалжуулагч нар оролцлоо.

Шагнал гардуулах энэхүү үйл ажиллагааг нээж МХБХ-ны ерөнхийлөгч А.Ганбаатар хэлсэн үгэндээ:

Ивээн тэтгэгч болон хөгжөөн дэмжигчгүйгээр дэлхий дээр ямар ч спортын төрөл амжилт олж байсан түүх байхгүй. Манай монголд ч гэсэн мөн ялгаагүй. Сайн спонсор – Спортын хөгжил гэж товчхоноор тодорхойлж болж байна. МХБХ-ны зүгээс хөлбөмбөгийн спортын үнэлэмжийг дотоодоо өсгөх, мөн хөлбөмбөгийн тамирчид жирийн ажилтай иргэдээс дутуугуй амьдарч болох тийм орчинг бүрдүүлэхийг зорьж яваа. Үүний тулд санхүүгийн байнгын итгэлтай найдвартай хамтрагч маш чухал. Тийм учир “Арвайн үндэс” ХХК-тэй хамтраад 4н жилийн 500 сая төгрөгийн гэрээ байгуулан хамтран ажиллаж байна. Арвайн үндэс ХХК-тэй хамтраад бид Монгол улсад байхгүй өндөр шагналын сантай тэмцээнүүдийг зохион байгуулж байна. Энэ нь цаашдаа маш олон тоглогчдыг мэргэжилийн болох талруу нь түлхэц урам болж өгнө гэдэг итгэлтэй байна.  Бид алийн болгон гадны лигийн тамирчдыг шүтэж тэдний талаар, гадны улсын баг, клубын  тоглолтыг шөнө оройгүй үзэж, хоорондоо ярилцаж өгүүлж байх билээ. Монгол тоглогчдоороо бахархаж, “Хүрхрээ”лигийнхээ тоглолтыг тогтмол үзэж, Монголын хөлбөмбөгийн клубүүд мянга мянган хөгжөөн дэмжигч, үнэнч фанаттай болох боломж бидний хамтын ажиллагааны үр дүнд  бий болох болно гэдэгт итгэлтэй байна хэмээн онцоллоо.

Ингээд тамирчдын бүтэн 5 сарын амжилтыг үнэлэх торгон мөч ирж амласан ёсоор шагналыг “Арвайн Үндэс” компанийн гүйцэтгэх захирал ноён О.Оргил болон МХБХ-ны ерөнхийлөгч А.Ганбаатар нар гардууллаа. Лигийн эхнээс хүчтэй өрсөлдөөнийг үзүүлж эцсийн мөчид 3-р байрт шалгарсан Б.Чин-Оргил дасгалжуулагчтай “Сэлэнгэпресс” багт 20 сая төгрөг, Б.Амартүвшин дасгалжуулагчтай “ФС Улаанбаатар” мөнгөн медалийг хүртэж 30 сая төгрөгийн эзэд болсон бол аваргын багт амласан 40 сая төгрөгийг З.Баттулга дасгалжуулагчтай “Эрчим” клуб ийнхүү хүртлээ. Тэд мөн “Хүрхрээ” дээд лигийн анхны аварга баг гэдгээр түүхэнд бичигдэн үлдэж байна.

5 дугаар сарын 16нд эхэлж байсан “Хүрхрээ” дээд лиг хөлбөмбөгийн спортын түүхэнд хамгийн хамгийн улирал болон үлдэж байна. Өөрөөр хэлбэл хамгийн олон баг оролцсон, хамгийн олон гоол орсон, хамгийн олон легионер тамирчид хүрэлцэн ирсэн, хамгийн олон үзэгчтэй, хамгийн олон тоглолтыг телевизээр эх орон даяар, сошиал ертөнцөөр дэлхий даяар шууд дамжуулсан улирал болсон билээ.

Ирэх жилийн наадам хол байна даа хол байна хэмээн үндэсний их баяр наадмаа хүлээдэг шиг ирэх жилийн “Хүрхрээ лигийг хүлээх хүмүүсийн тоо өдрөөс өдөрт нэмэгдсээр байна.

http://the-mff.mn/