Өглөө.мн Шинэ өглөө, Шинэ мэдээлэл
Монголын Залуучуудын холбооны дэргэдэх “Залуу дугуйчин” клубээс бүх нийтийн мод тарих өдрийг тохиолдуулан “Эх дэлхийдээ мод бэлэглэе” аянаа 3 дахь жилдээ амжилттай зохион байгууллаа.
Энэ жилийн мод тарих өдрөөр “Нэг дугуйчин-хоёр мод” уриан дор Ботаникийн цэцэрлэгт хүрээлэнд 30 гаруй дугуйчин залуус нийлж 100 улиас тарьсан юм.
Ботаникийн цэцэрлэгт хүрээлэн нь манай улсын ботаникийн шинжлэх ухааны судалгаа, туршилтын цорын ганц түшиц газар юм. Устаж буй ургамлыг аврах, Монгол Улсад ховор, ховордож буй ургамлуудыг тарималжуулах, үрийг нь хойч үедээ хадгалж үлдээх, хотын ногоон байгууламжид тарих чимэглэлийн мод, сөөг, өвслөг ургамлын төрөл зүйлийг нэмэгдүүлж, нутагшуулах туршилт судалгааны чухал ажлыг ШУА-ийн Ботаникийн хүрээлэнгийн Ботаникийн цэцэрлэгт хийдэг.
Тиймээс дугуйчин залуус эл газрыг сонгон авч, нэг буян болох мод тарих ажлаа өнгөрсөн амралтын өдөр амжилттай зохион байгууллаа.
Мод тарих газар хог хаягдалтай, зэрлэг өвс ихээр ургасан газар байсан тул ойр орчмын хогийг сайтар цэвэрлэсэн. Мод тарихад шаардлагатай ажлын бээлий, хөрс зэргийн төсвийг дугуйчдын хандиваар бүрдүүлжээ.
Мод тариад орхих биш, тарьсан мод, улиасаа ургуулахад клубын зүгээс анхаарч, услах, арчилж тордох ажлыг зохион байгуулахаар төлөвлөөд байна. Дашрамд улиас нь 80-100 болон түүнээс дээш жил насалдаг. Тоос шороо, хорт хий, утаанд тэсвэртэй, агаар цэвэршүүлж, тоосжилтыг багасгадаг.
Мөн усалгаа, арчилгаа бага шаарддаг, ургах чадвар сайтай зэрэг олон талын ач холбогдолтойн дээр 25 настай улиас жилд 44 кг хүчилтөрөгч ялгаруулдаг байна.
Мод тарьж байгаль орчноо сэргээх талаар бидний хийж буй ажлыг дэмжсэн Баянзүрх дүүргийн Засаг даргын тамгын газар, тус хүрээлэнг зүүн бүсийн мини парк болгон хөгжүүлэх зорилготой иргэдээс бүрдсэн “Чулуутын задгай” ТББ-ын тэргүүн н.Зэс-Эрдэнэд талархал илэрхийлье.
Ийнхүү байгаль орчинд ээлтэй унадаг дугуйг унаагаа болгосон залуу дугуйчин клубын эко үйлсийн давалгаа үргэлжилж, хотынхоо ногоон байгууламжийг нэмэгдүүлэх, байгаль орчноо хамгаалах үйлсэд нэгдсэн байна.
