Өглөө.мн Шинэ өглөө, Шинэ мэдээлэл
“The Spirit of Eurasia” нэртэй гэрэл зургийн үзэсгэлэнгийн нээлтийн ажиллагаа Нью-Йорк дахь НҮБ-ын Төв байранд 6 дугаар сарын 13-нд болов. Энэхүү үзэсгэлэнг Улаанбаатар хотноо болох АСЕМ-ийн Дээд түвшний уулзалттай холбогдуулан Монгол Улсаас НҮБ-ын дэргэд суугаа Байнгын төлөөлөгчийн газар, Ази, Европ ТББ-уудын сүлжээ (Asia Europe NGOs Network) байгууллага хамтран зохион байгуулж байгаа юм.
Элчин сайд, Байнгын төлөөлөгч С.Сүхболд, Нидерландын Элчин сайд, Байнгын төлөөлөгч Карл ван Оостером, Италийн Элчин сайд, Байнгын төлөөлөгч Себастиано Карди, Ази, Европ ТББ-уудын сүлжээ байгууллагын тэргүүн Жузеппе Сержи нар үзэсгэлэнг нээж, үг хэлэв.
Элчин сайд, Байнгын төлөөлөгч С.Сүхболд үзэсгэлэнг нээж хэлсэн үгэндээ АСЕМ байгуулагдасны 20 жилийн ойгоор Монгол Улс АСЕМ-ийн Дээд түвшний уулзалтыг эх орондоо зохион байгуулж буйг тэмдэглээд энэхүү чухал үйл явдлын хүрээнд АСЕМ-тай холбогдсон үзэсгэлэнг НҮБ-ын Төв байранд зохион байгуулж байгаа нь ихээхэн ач холбогдолтой болохыг онцлов.
Гэрэл зургийн үзэсгэлэнд АСЕМ-ийн гишүүн орнуудаас ирүүлсэн гэрэл зургуудыг оролцуулж байгаа бөгөөд хоёр үе шаттай явагдана. Эхний шат 6 дугаар сарын 13-25-нд, хоёр дахь шат 7 дугаар сарын 11-16-нд тус тус НҮБ-ын Төв байранд гарна.
Гадаад хэргийн яам
