Өглөө.мн Шинэ өглөө, Шинэ мэдээлэл
Дэлхий дэлэгнэж, дэнж хотойсон сайхан зун болж байна. Энэ жилийн долдугаар сард Монгол Улсад томоохон арга хэмжээ, баяр наадмууд зохиогдох юм. Тиймээс долдугаар сард цаг агаар ямар байхыг тоймлон хүргэе. Учир нь АСЕМ болон Үндэсний баяр наадам, төрийн тахилгат хайрхан Отгонтэнгэр, Сутайг тайх ёслол гээд баяр наадам, амралт зугаалга давхцдаг долдугаар сард цаг агаар ямар байх бол?
Зуны саруудаас хамгийн дулаан нь долдугаар сар бөгөөд агаарын температурын сарын дундаж нь Өмнөговь, Дорноговийн нутаг, Говь-Алтай, Баянхонгорын өмнөд хэсгээр 21-27 градус, Хөвсгөл, Архангайн ихэнх нутаг, Алтай, Баянхонгор, Өвөрхангайн хойд, Завханы зүүн, Баян-Өлгийн баруун хэсгээр 10-15 градус, бусад нутгаар 16-20 градус дулаан байдаг. Гэвч цаг агаарын нөхцөл жил бүр харилцан адилгүйг цаг уурчид хэлж байна. Тухайлбал,1996 онд баруун, төвийн нутгаар, 1999-2002, 2004-2005, 2007, 2008 онд ихэнх нутгаар олон жилийн дунджаас 2-5 градусаар дулаан, өдрийн үнэмлэхүй их температур Орхон-Сэлэнгийн бэлчир, говийн нутгаар 36-43 градус, бусад нутгаар 33-38 градус хүрч халж байсан бол 1976 онд баруун ба говийн нутаг, төвийн нутгийн баруун хэсгээр, 1978 онд говь ба зүүн зүгийн нутгаар олон жилийн дунджаас нилээд хүйтэрч, шөнийн үнэмлэхүй бага температур уулархаг нутгаар 3-8 градус хүйтэн, бусад нутгаар 2 градус дулаанаас 3 градус хүйтэн байжээ.
Алтайн өвөр говиор 33-38 градус хүртэл хална
Бaруун зүгийн нутаг:Агаарын температурын сарын дундаж нь уулархаг нутгаар 12-17 градус, Алтайн өвөр говиор 22-27 градус, бусад нутгаар 18-23 градус дулаан буюу Увс, Ховдын ихэнх, Баян-Өлгийн зүүн өмнөд, Завхан, Говь-Алтайн баруун хэсгээр олон жилийн дунджаас 0.5-1.0 градусаар дулаан, бусад нутгаар олон жилийн дунджийн орчим байна гэж Ус цаг уурын хүрээлэнгээс мэдээлэв.
Нэг ба гуравдугаар арав хоногийн эхэн болон сүүлч, хоёрдугаар арав хоногийн дунд үеэр бага зэрэг сэрүүсч уулархаг нутгаар шөнөдөө 3-8 градус, өдөртөө 15-20 градус дулаан, Их нууруудын хотгор, Алтайн өвөр говиор шөнөдөө 15-20 градус, өдөртөө 25-30 градус дулаан, бусад нутгаар шөнөдөө 9-14 градус, өдөртөө 19-24 градус дулаан байна. Бусад хугацаанд уулархаг нутгаар шөнөдөө 8-13 градус, өдөртөө 21-26 градус дулаан, Их нууруудын хотгор, Олон нууруудын хөндий, Алтайн өвөр говиор шөнөдөө 19-24 градус, өдөртөө 28-33 градус дулаан, бусад нутгаар шөнөдөө 14-19 градус, өдөртөө 25-30 градус дулаан байх ба ялангуяа хоёрдугаар арав хоногийн эхэн үеэр Их нууруудын хотгор, Олон нууруудын хөндий, Алтайн өвөр говиор өдөртөө 33-38 градус, бусад нутгаар 27-32 градус хүрч халах төлөвтэй байна.
Говь-Алтайн зүүн өмнөд, Баянхонгорын өмнөд хэсгээр олон жилийн дунджаас ахиу, Увс, Ховдын ихэнх Баян-Өлгийн зүүн өмнөд, Завхан, Говь-Алтайн баруун хэсгээр олон жилийн дунджаас бага, бусад нутгаар олон жилийн орчим орох төлөвтэй байгааг цаг уурчид хэллээ.
Төвийн нутаг:Агаарын температурын сарын дундаж нь нутгийн баруун хэсгээр 12-17 градус, бусад нутгаар 17-22 градус дулаан буюу Хөвсгөлийн баруун хэсгээр олон жилийн дунджаас 0.5-1.0 градусаар дулаан, бусад нутгаар олон жилийн дунджийн орчим байх төлөвтэй байгаа аж.
Нэгдүгээр арав хоногийн дунд үе болон сүүлч, хоёрдугаар арав хоногийн сүүлч, гуравдугаар арав хоногийн эхэн болон эцсээр сэрүүсч Хангай, Хөвсгөлийн уулархаг нутгаар шөнөдөө 4-9 градус, өдөртөө 15-20 градус дулаан, Орхон, Сэлэнгийн сав газраар шөнөдөө 10-15 градус, өдөртөө 19-24 градус дулаан, бусад нутгаар шөнөдөө 9-14 градус, өдөртөө 16-21 градус дулаан байна. Бусад хугацаанд Хангай, Хөвсгөл, Хэнтэйн уулархаг нутгаар шөнөдөө 6-11 градус, өдөртөө 22-27 градус дулаан, бусад нутгаар шөнөдөө 14-19 градус, өдөртөө 25-30 градус дулаан байх ба ялангуяа хоёрдугаар арав хоногийн эхний хагас, гуравдугаар арав хоногийн дунд үеэр Орхон, Сэлэнгэ, Хараа, Туул голын сав нутгаар 29-34 градус хүрч халах төлөвтэй байгааг Ус цаг уурын хүрээлэнгээс онцлов. Энэ сард орох тунадасны нийлбэр хэмжээ нь Хөвсгөлийн хойд, Сэлэнгийн баруун хойд хэсгээр олон жилийн дунджаас бага, бусад нутгаар олон жилийн дунджийн орчим бороо орох төлөвтэй байна. Нэг ба хоёрдугаар арав хоногийн эхээр нутгийн хойд хэсгээр бороо орно. Нэг ба хоёрдугаар арав хоногийн дунд үе, гуравдугаар арав хоногийн эцсээр ихэнх нутгаар, нэг ба хоёрдугаар арав хоногийн эцэс, гуравдугаар арав хоногийн эхээр зарим газраар түр зуурын бороо орох төлөвтэй байгаа аж.
Зүүн зүгийн нутаг: Агаарын температурын сарын дундаж нь ихэнх нутгаар 18-23 градус дулаан буюу нийт нутгаар олон жилийн дунджийн орчим дулаан байх гэнэ.
Нэгдүгээр арав хоногийн эхэн ба сүүлч, гуравдугаар арав хоногийн эхээр бага зэрэг сэрүүсч нутгийн хойд хэсгээр шөнөдөө 5-10 градус, өдөртөө 19-24 градус дулаан, бусад нутгаар шөнөдөө 9-14 градус, өдөртөө 22-27 градус дулаан байна. Бусад хугацаанд ихэнх нутгаар шөнөдөө 13-18 градус, өдөртөө 25-30 градус дулаан байх ба хоёр ба гуравдугаар арав хоногийн дунд үеэр зарим нутгаар өдөртөө 29-34 градус хүрч халах бололтой. Энэ сард орох борооны нийт хэмжээ нь Дорнодын хойд хэсгээр олон жилийн дунджаас бага, Хэнтийн зүүн өмнөд, Сүхбаатарын баруун хэсгээр олон жилийн дунджаас ахиу, бусад нутгаар олон жилийн дунджийн орчим байна.
Нэг ба гуравдугаар арав хоногийн эцэс, хоёрдугаар арав хоногийн эхэн ба эцсээр ихэнх нутгаар түр зуурын бороо орно. Нэгдүгээр арав хоногийн дунд үе, гуравдугаар арав хоногийн эхэн ба дунд үеэр зарим газраар бороо орохоор байгаар цаг уурчид мэдээлж байна.
Говийн нутаг: Агаарын температурын сарын дундаж нь Дундговийн нутаг, Дорноговийн хойд, Өмнөговийн баруун хэсгээр 17-22 градус, бусад нутгаар 22-27 градус дулаан буюу нийт нутгаар олон жилийн дунджийн орчим байх аж.
Нэгдүгээр арав хоногийн дунд үе болон хоёр ба гуравдугаар арав хоногийн эхээр бага зэрэг сэрүүсч нутгийн хойд хэсгээр шөнөдөө 10-15 градус, өдөртөө 20-25 градус дулаан, бусад нутгаар шөнөдөө 14-19 градус, өдөртөө 23-28 градус дулаан байна. Бусад хугацаанд ихэнх нутгаар шөнөдөө 17-22 градус, өдөртөө 28-33 градус дулаан байх ба ялангуяа хоёрдугаар арав хоногийн дунд үеэр зарим нутгаар өдөртөө 31-36 градус хүрч хална.
Энэ сард Өмнөговийн баруун болон зүүн, Дорноговийн баруун болон зүүн хойд, Дундговийн өмнөд хэсгээр олон жилийн дунджаас ахиу, бусад нутгаар олон жилийн дунджийн орчим бороо орохоор байна. Нэг ба хоёрдугаар арав хоногийн сүүлийн хагаст, гуравдугаар арав хоногийн дунд үеэр ихэнх нутгаар, нэгдүгээр арав хоногийн дунд үе, хоёр ба гуравдугаар арав хоногийн эхээр зарим газраар түр зуурын бороо орох аж.
