Үндэсний их баяр наадмын бэлтгэлийг бүрэн хангах үүрэг өгөв

Улаанбаатар хотын Ерөнхий менежерийн шуурхай хуралдаан боллоо. Шуурхай хуралдаанаар инженер хангамж нийтийн үйлчилгээний байгууллагууд мэдээлэл хийв.

Торгоны зам цогцолборын ажлын хүрээнд 204 м2 явган  хүний замын хавтанг шинээр суурилуулан, гэрэлтүүлэг тавьж, чулуужсан мод байрлуулан зүлэгжүүлэлт хийснийг танилцуулсан.

“Нийтийн үйлчилгээний Улаанбаатар нэгтгэл” Энхтайваны өргөн чөлөө, Намъянжүгийн гудамж, Нарны зам, Дамдинсүрэнгийн гудамж, Юнескогийн гудамж, Олимпийн гудамж, Энгельсийн гудамжны нийтийн эзэмшлийн гудамж зам талбайн 142 төмөр, түмбэ, шон, хайсны үлдэгдэл ёзооруудыг авав.

Борооны ус зайлуулах шугамын нэвтрэх чадварыг нэмэгдүүлэх ажлын хүрээнд далангийн  1021.08м3 лагийг цэвэрлэн тээвэрлэсэн. Нийт  1436 шүүрт худаг, 89443 у/м шугам, 1267 үзлэгийн худгийг засварлалаа.

Нисэх, Яармагийн  аюулгүйн тойргоос Чингисийн хүрээ жуулчны бааз руу салах уулзвар хүртэлх 3,3 км урт автозамын голын тусгаарлах зурвас газрыг зүлэгжүүлсэн бөгөөд цэцэгжүүлэх ажил хийгдэж эхлээд байна.

АСЕМ-ийн тохижилт, хотын өнгө үзэмжийг сайжруулах ажлын хүрээнд  “Ач –Очир” ХХК, “Эс-Деволопмент” ХХК, “Вест Хилл” ХХК, иргэн Н.Баттулга, Л.Болорболд, Ус сувгийн удирдах газрын сургалтын төв,  “Эфис” констракшн, “Моннис” групп, “MSM” ХХК, “Эм Ай Ти Ай Си” ХХК, “Монголиа Проперти Деволопмент ” ХХК зэрэг 11 аж ахуйн нэгж байгууллага,  78 159 000 төгрөгийн өөрийн хөрөнгөөр барилгын хашаа, хайс хашлагаа засварлан будаж, зам талбайн тохижилтын ажлыг хийжээ.

Хотын Ерөнхий менежер Б.Бадрал “Нийтийн эзэмшлийн гудамж зам талбайн хайс хашлагыг угаах, гол болон туслах замуудын тэмдэг тэмдэглэгээг хийж дуусгах, Төв цэнгэлдэх хүрээлэн, Чингисийн хүрээ, Хүй долоон худгийн цэвэрлэгээ үйлчилгээг сайжруулах, гэр хороолол, орон сууцны доторх зэрлэг ургамлыг устгах ажлыг зохион байгуулахыг  нийтийн үйлчилгээ, инженер хангамжийн байгууллагуудад үүрэг болгов.

Мөн Үндэсний баяр наадмын бэлтгэл ажлын хүрээнд нийтийн тээврийн автобусны гадна дотор талыг өнгө үзэмжийг сайжруулж, жолооч нарыг цагаан цамц хар зангиатай үйлчилгээнд гаргах хэрэгтэйг санууллаа.