Монголын жүдочид амжилтаараа тэргүүллээ

Олон улсын жүдо бөхийн холбоо (IJF)-ны хөтөлбөрт багтдаг “Чингис хаан” гран при тэмцээн долдугаар сарын 1-3-ны өдрүүдэд Буянт-Ухаа спортын ордонд амжилттай болж өндөрлөлөө.

Олимпийн өмнөхөн болсон тус тэмцээнд дэлхийн шилдэг жүдочид цөөн ирсэн ч залуучуудад өөрийгөө нээн харуулах боломж олгосон тэмцээн боллоо. Олон улсын жүдо бөхийн холбоо, Монголын жүдо бөхийн холбоо болон Эрүүл мэнд, спортын яам, Нийслэлийн Засаг даргын Тамгын газар хамтран зохион байгуулсан “Чингис хаан” гран прид дэлхийн 13 орны 134 жүдоч авхаалж, самбаа ур чадвараа харуулан гурван өдрийн турш өрсөлдлөө.

Тус тэмцээнд нийлбэр дүнгээрээ манай улсын баг тамирчид  9 алт, 10 мөнгө, 10 хүрэл медаль хүртсэн амжилтаар тэргүүллээ.