Гаднын хөрөнгө оруулалттай банкууд иргэдээс хадгаламж татахгүй

Дэлхийн хаана ч байхгүй өндөр хүүтэй гэгддэг манай хэдэн арилжааны банкууд иргэдэд үйлчилгээгээ тулгасаар удлаа. Эдийн засгийн хямралтай үед, бусад салбарууд бүгд унасан ч ашигтай ажиллаж байдаг энэ арилжааны банкуудын жилийн цэвэр ашиг нь 200-300 тэрбум төгрөгөөр тоологддог гэж байгаа. Гэсэн ч хүү, төлбөрөө буулган дэлхийн жишигт нийцүүлж, ард иргэдийнхээ амьдралд тус нэмэр болох дорвитой алхам хийлгүй өдий хүрсэн. Тиймээс олон нийтийн зүгээс гаднын томоохон банкуудыг оруулж ирэн “шулаач” арилжааны банкуудын шимтгэл, хүү, төлбөрийг буулгахыг хүсэх болсон. Харамсалтай нь, арилжааны банкуудын зүгээс гаднын банк орж ирснээр үндэсний аюулгүй байдалд заналхийлнэ хэмээн ард иргэдийн тархийг угааж, хар пиарыг маш ихээр цацаж байгаа.

Тэгвэл ямартай ч Монгол Улсын төр гаднын цөөн хэдэн том банкийг оруулж ирэн нь зөв зүйтэй алхам болохыг тодорхойлж, Засгийн газрын хуралдаанаар Банкны тухай хуульд нэмэлт, өөрчлөлт оруулах тухай хуулийн төслийн үзэл баримтлалыг хэлэлцээд Засгийн газрын гишүүдийн саналыг тусган Засгийн газрын хуралдаанд танилцуулахыг Хууль зүй, дотоод хэргийн сайд, Сангийн сайд нарт даалгаж, Монголбанкны Ерөнхийлөгчид зөвлөсөн байна. Төсөлд гадаадын хөрөнгө оруулалттай банкны салбарыг Монгол Улсад нээх, үйл ажиллагааных нь чиглэл, хүлээх үүрэг, хариуцлагыг тусгажээ. Түүнчлэн улс орны нийгэм, эдийн засагт ач холбогдол бүхий үр өгөөжтэй томоохон төсөл, хөтөлбөрийг санхүүжүүлэх, барьцаалах, батлан даах зэрэг харилцааг энэ хуулиар зохицуулах юм. Харин гадаадын хөрөнгө оруулалттай банк нь хадгаламж татахгүй, иргэдийн банкны чиглэлээр үйл ажиллагаа явуулахгүй байх, зах зээл дээрх өрсөлдөөнийг хязгаарлах болон давамгай байдал үүсгэхийг хориглохоор төсөлд тусгажээ.

Өөрөөр хэлбэл, одоогийн энэ төлсөөр гаднын банкууд орж ирсэн ч манай хэдэн арилжааны банкуудын хэт өндөр хүү, төлбөр буурахгүй гэсэн үг юм. Олон нийтийн зүгээс гаднын банк оруулж ирэн дотоодын хэдэн арилжааны банкуудын хүү, төлбөрийг л буулгахыг хүсч буй бөгөөд эрх баригчид арилжааны банкуудын лоббинд автав уу хүү, төлбөрийг буулгах бололцоог олгохгүй нь бололтой. Гэхдээ ямар ч байсан гаднын банкууд орж ирэх нь эхний дэвшилтэт алхам юм. Харин үүний дараа дотоодын банкуудын хүү төлбөр аажмаар буурна гэдэгт олон нийт итгэж байна.

Нинж