Өглөө.мн Шинэ өглөө, Шинэ мэдээлэл
“Централ Тауэр”-т гадаадын иргэн тэсрэх бөмбөг дэлбэлнэ хэмээн заналхийлсэн хэрэг өнгөрсөн даваа гаригт гарч, тус барилгыг цагдаа, онцгойгийнхон хамгаалалтад авч, шуурхай ажилласан. Сэжигтнийг анх Данийн иргэн гэж байсан ч шалгалтаар АНУ-ын иргэн, 52 настай Майкл гэгч байсныг хууль хяналтынхан тогтоосон.
Мөн энэ хэргийг Цагдаагийн байгууллагаас Тагнуулын ерөнхий газарт шилжүүлсэн юм. Түүнчлэн цагдаа болон тагнуулын байгууллагын шалгалтаар “Централ тауэр”-аас ямар нэгэн тэсэрч, дэлбэрэх зүйл олдоогүй байна. Сонирхолтой нь, АНУ-ын иргэнд Терроризмтой тэмцэх тухай хууль зөрчсөн гэх үндэслэлээр захиргааны хариуцлага тооцож, торгоод сулласан байна.
Сүрдүүлэгч этгээд “Централ Тауэр”-ын XV давхарт байрлах Дани Улсын өргөмжит консул, “Эм-Си-Эс” группийн ерөнхийлөгч Ж.Оджаргалтай уулзах хүсэлт тавьсан боловч “Боломжгүй” гэсэн хариу сонсоод “Бөмбөг тавина” хэмээн сүрдүүлсэн нь Тагнуулын байгууллагын шалгалтаар тогтоогдсон байна.
