Д.Ариунболд: Жилд нэг сая тонн нүүрс угаах үйлдвэр байгуулна

Улаанбаатар /МОНЦАМЭ/. “Эрдэнэс Тавантолгой” компани 2010 онд БНХАУ-ын “Чалко” компаниас авсан 350 сая ам.долларын зээлийг бүрэн төлж дууссан талаар өнөөдөр мэдээлсэн. Ингэснээр Тавантолгойн ордын нүүрсний борлуулалтын бүх орлого Монгол Улсын төсөвт төволөрөх боломж бүрдэж байгаа юм. Энэ талаар “Эрдэнэс Тавантолгой” компанийн Гүйцэтгэх захирал Д.Ариунболдоос тодруулав.

-“Чалко” компанитай хийсэн гэрээнд өрөө барагдуулж дууссаны дараа таван жилийн хугацаанд Зүүн Цанхийн ордны нүүрсний 80 хувийг нийлүүлнэ гэж тусгасан. Гэхдээ бид үнийг тодорхой хэмжээнд өсгөж, дэлхийн зах зээлийн жишигт хүргэх санал тавьсан. Одоо хэлэлцээр явагдаж байгаа.

-Хүний хөгжил сангаар дамжуулан иргэдэд олгосон 200 сая ам.долларын өр бий. Хүү нь 39 сая ам.доллар. Ам.долларыг төгрөгт шилжүүлж тооцоход бидний төлөх өр 700 тэрбум төгрөг болох юм. Үүнийг энэ онд багтаан шийдвэрлэх зорилт тавьж байгаа.

-Тавантолгойн олборлолт эхлэх үед манай компани жилд 20 сая тонн нүүрс угаах хүчин чадал бүхий үйлдвэрийг 570 сая ам.доллараар байгуулахаар ТЭЗҮ-ээ боловсруулж, батлуулсан. Нүүрс угаас усыг Балгасын улаан нуураас татахаар төлөвлөсөн байсан ч аймгийн ИТХ зөвшөөрөл олгоогүй учраас түр зогссон. Үйлдвэр барих өртөг өндөр байгаа тул эхний ээлжинд нэг сая тонн нүүрс угаах үйлдвэр байгуулахаар ажиллаж байна. Уг үйлдвэрээ шат дараатайгаар өргөжүүлж, 20 сая тоннд хүргэх юм. Загийн усны хоолойгоос ус татахаар БОАЖЯ-наас зөвшөөрөл авсан. Боломжтой бол үйлдвэр байгуулах ажлыг энэ онд эхлүүлнэ.

-Манай толгой компани болох “Эрдэнэс Монгол” нь автозам хариуцдаг. Энэ жил 11 тэрбум төгрөгөөр автозамын засвар хийхээр төлөвлөж, тендер зарласан байгаа. Засварын ажил бүрэн дууссаны дараа автозамын тээвэрлэлт хэвийн явагдана. Бид аль болон нүүрсний төмөр замын тээвэрлэлтээ нэмэгдүүлэх зорилт тавьж байгаа. Энэ асуудлыг Монголын төмөр зам шийдвэрлэнэ.

-Бүртгэлийн асуудал бүрэн дуусаагүй байгаа тул 1072 хувьцаа манай блансад бүртгэгдээгүй байгаа. Сонгуулийн өмнө л гэхэд хувьцаанаас 300 мянган төгрөг тараасан. Түүнээс өмнө оюутнууд төлбөртөө өгсөн зэрэг асуудал бий. Одоо Сангийн дэд сайдаар ахлуулсан ажлын хэсэг энэ бүхнийг нэгтгэхээр ажиллаж байгаа. Энэ оны сүүлээр бид дотоодын өрөө бүрэн барагдуулсны дараагаар компанийнхаа дүрэмд өөрчлөлт оруулж, 1072 хувьцааг Хөрөнгийн зах зээлд гаргана. Ингэснээр ногдол ашиг буюу хишиг хүртээх боломж бүрдэнэ.