Өглөө.мн Шинэ өглөө, Шинэ мэдээлэл
Монгол Улсын ерөнхийлөгчийн 2017 оны ээлжит сонгуулийн санал авах үйл ажиллагаа өглөөний 07:00 цагт албан ёсоор эхэллээ. Монгол Улсын Ерөнхийлөгчийн ээлжит 7 дахь удаагийн сонгуульд нутаг дэвсгэрийн хэмжээнд аймаг, нийслэлийн 22 сонгуулийн хороо, сум дүүргийн 339 сонгуулийн хороо 1983 хэсгийн санал авах байр ажиллаж байна.
Ерөнхийлөгчийн сонгуулийн нэрсийн жагсаалтад 1 сая 978 мянга 298 мянган сонгогч бүртгэгджээ. Үүнээс 904 мянга 336 сонгогч нь нийслэлд байгаа бол хөдөө орон нутагт 1 сая 73 мянга 962 сонгогч байна.
Өглөөний 08:00 цагийн байдлаар Нийслэлийн Баянзүрх дүүргийн 27 дугаар хорооны 1740 дугаар хэсгийн ахлах зохион байгуулагч Д.Өлзийбаяраас цаг үеийн мэдээлэл авлаа.
– Танай хэсэг дээр сонгуулийн насны нийт хэдэн хүн саналаа өгөх вэ?
– Манай хэсэг дээр санал өгөхөөр 1272 хүн бүртгүүлсэн байна.
– 08:00 цагийн байдлаар ирц хэдэн хувьтай явж байна. Нийт хэдэн хүн саналаа өгсөн байна вэ?
– Одоогоор 08:00 цагийн байдлаар 43 иргэн саналаа өгчээ. Сонгуулийн ирц 3.5 хувьтай явж байна. Энэ жилийн сонгуульд иргэд идэвхтэй саналаа өгч байна.
– Хэрэв танай 1740 хэсэг дээр орой 22:00 цагаас өмнө ирц хүрэхгүй асуудал гарвал ямар арга хэмжээ авах вэ?
– Монгол Улсын тав дахь төрийн тэргүүнээ сонгох чухал хариуцлагатай энэ үед иргэн бүр үндсэн хуульд заасан үүргээ биелүүлж сонгуульдаа идэвхтэй өгөх байх гэдэгт итгэлтэй байна. Ирц хүрэлцэхгүй байх гэсэн асуудал гарахгүй байлгүй дээ.
– Өчигдөр зөөврийн хайрцагаар хэдэн хүнээс санал авсан бэ?
– 2017 оны 6 дугаар сарын 25-ны өдөр буюу өчигдөр өөрийн биеэр саналаа өгч чадахгүй дөрвөн иргэнээс зөөврийн хайрцагаар санал авсан байгаа.
-Танай хэсэг нийт хэдэн хүний бүрэлдэхүүнтэй ажиллаж байна вэ?
-Долоон хүний бүрэлдэхүүнтэй. Ахлах зохион байгуулагч, нарийн бичиг, зохион байгуулагч гэсэн бүрэлдэхүүнтэй ажиллаж байна.
–Намуудаас хэчнээн ажиглагч байгаа вэ?
-Ардчилсан намаас 4, Монгол ардын намаас 4, Монгол Ардын Хувьсгалт намаас 2 нийт 10 ажиглагч ажиллаж байна.
-Мэдээлэл өгсөнд баярлалаа.
Г.Нараа
