М.Анхцэцэг Дэлхийн аваргын медальтан боллоо

АНУ-ын Калифорни Анахайм хотод зохион байгуулагдсан хүндийн өргөлтийн насанд хүрэгчдийн Дэлхийн аварга шалгаруулах тэмцээн үргэлжилж байна.

Эмэгтэйчүүдийн 26 дахь удаагийн ДАШТ-д манай улсаас Үндэсний шигшээ багийн ахлах дасгалжуулагч Ц.Хосбаяраар удирдуулсан Азийн аварга, залуучуудын дэлхийн аварга М.Анхцэцэг тэргүүтэй гурван тамирчин оролцсон билээ. ДАШТ-ий 75 кг-ын жинд Азийн аварга, залуучуудын дэлхийн аварга М.Анхцэцэг өрсөлдөн Дэлхийн аваргын медалийг эх орондоо авчирлаа. Тэрбээр эхний оролдлогоор 101 кг-ыг өргөж, удаах 106 кг-ыг алдаатай өргөсөн ч сүүлийн гурав дахь оролдлого 107 кг-ыг амжилттай өргөж хүрэл медалийн эзэн болж Монголын хүндийн өргөлтийн тамирчдаас анхлан Дэлхийн аваргын медальтан болсон тамирчин боллоо.