Нохой жилтнүүд муу зан төлвөө засаж, сайн төрх байдлаа хөгжүүлснээр жилээ даана

Төрсөн жилд дээрээ эргэлтээр давтагдан тоологдохыг “жил орох” гэдэг. Жил орсон хүмүүсийн заяа төөрөг харилцан адилгүй хүнд хөнгөн тусдаг нь тухайн жилтний зан төлөв, төрх байдал зэрэг олон хүчин зүйлсээс шүтэн барилдлагатай. Нохой жилтэн болвоос омог уур ихтэй, асрахуй багатай, дотуур тамиртай, хэрэгцээтэй үед л санал бодлоо хэлдэг, зөрүүд талдаа, амархан гутардаг, махруу, үнэнч шударга, нууц сайн хадгалдаг, сэтгэн бодох чадвар сайтай гэж зурхайд үзсээр иржээ. Тэгэхээр 2018 онд та дээр өгүүлсэн муу төлөвөө засаж, сайн төрх байдлаа хөгжүүлснээ жилээ дааж гарна. Нохой жилтнүүд орсон жилдээ гэрлэх, байшин худалдан авах, хүүхэдтэй болох зэрэг аз жаргалтай үйл явдлуудыг төлөвлөвөл үр өгөөж арвин байх нь. Зорилгодоо хүрэх арга замыг амар олжхарж чадна. Мөнгө олохын төлөө хэт шунах нь эрсдэл дагуулна. Уур хилэнгээ хянаж чадаагүйгээс залруулахад хүндрэлтэй, маргаантай асуудалд удаан хугацаагаар орооцолдох хэрэггүйг анхаар.

МӨНГӨ САНХҮҮ

Нохой жилтнүүдэд “орсон жил’ нь дундаж орлого, цалинг олгож байна. Гэхдээ тээвэр, үл хөдлөх хөрөнгө, техник, технологийн салбарт илүү цалин, орлоготой байх нь. Та эрсдэлд өртөх, гэр бүлийн хүмүүс чинь өвдөх зэргээр зардал чирэгдэл их гарч болзошгүй. Жилийн туршид бага гэлтгүй цуглуулж хуримтлал үүсгэхийг хичээ. Хуримтлуулсан мөнгөө бусдад зээлүүлэх гэсний хэрэггүй, учир нь тэр мөнгө таны гал унтраах сан байх болно. Бизнес эрхлэгчид хэт их тэлэлт хийх хэрэггүй. Жилийн эхэнд үл хөдлөх хөрөнгө худалдан авбал жилийн эцсээр арвин их орлого өгнө.

АЖИЛ АЛБА

Та ажил мэргэжлээрээ олон сорилтод орж, зарим хүндрэлтэй тулгарна. Ялангуяа 3 болон 9-р сард том сорилттай тулна. Сорилт бэрхшээлээс зугтааж ажлаа солихыг эрмэлзвэл одоогийн ажлын байраа алдаж удаан хугацаанд ажилгүй байж ч мэднэ. Тиймээс ажилдаа үлдээд илүү их ур чадвэр, эзэмшихийн тулд суралцаж “салхи” сөр. Үүнд хамт олон, найз нөхөд тань туслана. Шинээр бизнес эрхлэх гэж байгаа бол “долоо хэмжиж нэг огтлоорой”. Эс бөгөөс дахин тэр тухай бодох ч тэнхээгүй болно. Бизнес эрхлэгчид хамтарсан бизнест амжилт гаргана. Ялангуяа үл хөдлөх, технологи, дулааны эрчим хүчний төсөл болон соёлын төслүүдэд идэвхтэй оролцвол шагнал хүртэх ерөөл билэг байна.

ХАЙР СЭТГЭЛ

Ажил дээр үүсэх таагүй явдлаас улбаалсан үл ойлголцол таны гэрт “үүрлэх”-ийг анхааруулж байна. Таны ажилдаа хэт анхаарснаас хайр сэтгэл хөрч мэдэх юм. Мөн гуравдагч таны сэтгэлт тааламж бий болгож салах, гэрлэх эсэхээ шийдэх цаг ирнэ. Танд тэвчээр л хамгаас чухал “зэвсэг” болох нь ээ. Хэрэв та ганц бие, амрагаа хайж байгаа бол олон сонголтоос шилэх боломжтой. Тэдгээрээс Морь, Бар жилтэн танд тохиромжтой. Та эмэгтэй бол Морь жилтэнтэй дотно харилцаа үүсгэж цаашлаад гэрлэж чадвал бүр сайн. Таны бардам, эрс шийдэмгий зан боломжийг үгүй хийж магадгүй.

ЭРҮҮЛ МЭНД

Эрүүл мэнд дундаж байна. Ахмад хүмүүс амьсгалын замын өвчлөл, толгой өвдөх, чихрийн шижин тусах магадлалтай. Ихэнх “Нохой”-нуудын гар, хөл гэмтэх, хурц үзүүртэй зүйлд өртөх эрсдэл дагаж байгааг анхаар. Хэт их хямрах, бухимдах, буруу хоололт зэргээс ходоод, гэдэс байнга хямарна. Үүнээс сэргийлэх хамгийн сайн арга бол зөв хооллолт, дасгал, бясалгал хэлбэр юм. Хангалттай амралт өөртөө гаргаж байх нь бас нэгэн зөв алхам болно. Гэхдээ амралтаа зугаа цэнгэлд бүү зориул. Цэвэр агаарт алхаж заншвал дээрх эрсдлээс сэргийлж чадна.