Серена Уильямс тэмцээнээ цааш үргэлжлүүлж чадахгүй болжээ

Мэргэжлийн талбайн теннисний Францын нээлттэй тэмцээн Парист үргэлжлэн явагдаж байна.

Энэ оны хоёр дахь “Их дуулга” болох Францын нээлттэй тэмцээн өндөрлөхөд зургаан өдрийн тоглолт үлдлээ. Эмэгтэйчүүдийн ганцаарчилсан төрлийн дөрөвдүгээр тойрогт АНУ-ын Серена Уильямс, ОХУ-ын Мария Шарапова нар оноолт таараад байсан. Хоёр теннисчний тоглолт өнгөрсөн шөнө болох байсан ч Серена хэвлэлийн хурал хийж, тэмцээнийг өндөрлүүлснээ мэдэгдсэн.

Тэрбээр “Харамсалтай нь миний цээжний булчин жаахан асуудалтай байна” хэмээн цээжнийхээ гол хэсгийг заан тайлбарлажээ.

“Урьд нь надад ийм зүйл ер тохиолдож байгаагүй. Үнэхээр их өвддөг юм билээ. Тэмцээнийг цааш үргэлжүүлж чадахгүй болсондоо харамсалтай байна” гэсэн байна.

Серена эгч Винусын хамт хосын төрөлд тоглож, ням гарагт гурав дахь тоглолтоо хийсэн ч ялагдал хүлээсэн билээ. Тэгвэл ганцаарчилсан төрөлд 16-д үлдээд байсан ч биеийн байдлаас болж дараагийн тоглолтоо хийж чадсангүй. Энэ жил 36 настай Серена 2017 онд охинтой болсон бөгөөд дахин талбайд гараад байгаа нь энэ юм.

Тэгвэл 31 настай Шарапова сэргээшийн асуудлаас болж “Рио-2016” олимпийн наадамд орж чадалгүй шийтгэл авсан. Шарапова дахин талбайд гарсан ч төдийлөн өндөр амжилтыг үзүүлж чадахгүй байгаа билээ.

Мария Шараповагийн дараагийн тоглогч бол Испанийн теннисчин Мугурза юм. Түүнийг хожиж чадвал хагас шигшээд үлдэнэ.

Т.Цогт