Гурван талт уулзалт хийжээ

Японы байгаль орчны сайд Масахару Накагава бямба гарагт галт шоргоолжны тархалтаас сэргийлэх арга хэмжээ авахыг Хятад улсад уриалсан тухай “Киодо” агентлаг мэдээлэв.

Хятадын Сужоу хотод болсон байгаль орчны сайд нарын гурван талт уулзалтын үеэр М.Накагава БНХАУ-ын байгаль орчны сайд Ли Ганжиэ-д уг хүсэлтээ тавьсан байна. Өнгөрсөн онд Хятадаас Япон руу далайгаар тээвэрлэн хүргэсэн чингэлгүүдэд хортой галт шоргоолж удаа дараа олноороо илэрсэн ажээ.

Японы байгаль орчны яамны мэдээлснээр, зургадугаар сарын эхээр Хятадаас Осака боомтод ирсэн чингэлэгээс мөн 2000 гаруй галт шоргоолж илэрсэн байна. Японы талын хүсэлтийн хариуд Хятадын сайд хэлэхдээ “Өмнөд Америкаас гаралтай уг шоргоолжуудыг устгах асуудал дээр манай улсын байгаль орчны яамны холбогдох газрын мэргэжилтнүүд улам их хүчин чармайлт гарган ажиллах болно” гэжээ.

М.Накагава Өмнөд Солонгосын байгаль орчны сайд Ким Ен Кьюнтай мөн уулзсан бөгөөд түүнд Солонгосоос их хэмжээний хуванцар сав суулга Японы далайн эрэгт түрэгдэн ирж буй тухай мэдэгдээд, уг асуудлаар урьдчилан сэргийлэх арга хэмжээ авахыг хүсэхэд Ким Ен Кьюн уг асуудлыг шийдвэрлэхээ амалсан байна.

Япон, Хятад, Өмнөд Солонгосын байгаль орчны сайд нарын гурван талт уулзалтыг 1999 оноос хойш жил бүр зохион байгуулж байгаа бөгөөд ням гарагт болсон уулзалтын дараа сайд нар хамтарсан мэдэгдэл гаргажээ.