Гэмтлийн эмнэлгийн удирдлагуудын “но” илэрч эхэллээ

  Гэмтлийн эмнэлгийн тендерийн хороог шалгавал яасан юм бэ  

Өнгөрсөн долоо хоногт Гэмтэл со­гог судлалын үндэс­ний төвийн эмч нар ши­нэхэн  томилогдсон дарга Ч.Энхбаярыгаа эсэргүүцэн ажил хаяж  шуугиан тариад авсан.

Хамгийн гол нь тус эм­нэлгийн архагууд  буюу хууччуул нь Ц.Энх­баярыг эмнэлгийн дарга болох ёсгүй хэмээн үзэж байгаа.

Тод­руулбал тус эмнэлгийн экс дарга С.Отгонгэрэл өө­рийн хүрээний хүмүүсээ  Ц.Энх­баярын  эсрэг  тур­хирч  ажил хаялт зохион бай­гуул­сан аж.

Ингэхгүй бол эмнэлгийн шинэ дарга ажлаа хүлээж авсан тохиолдолд энд явагддаг хууль бус бизнесүүд  зогсох учраас тэр гэнэ.

Үүнээс болж Ц.Энх­баярыг эсэр­гүү­цэж байс­ныг  хэд хэдэн  эх сур­валж хэлж байна.

Тэд гэмтлийн эмнэлгийн даргад өрсөлдсөн Эмчилгээ эрхэлсэн орлогч дарга  Б.Баттөгс нь С.Отгонгэрэлийн баруун гар гэдгийг нотлоод байгаа. Тэрбээр эм эмнэлгийн ху­далдан авах тендерийг хариуцдаг байсан нэгэн юм байна.

Ингэхдээ жил бол­гон ямар нэгэн тендер шалга­руулалгүйгээр зөвхөн өө­рийн хувийн компаниасаа эмнэлэгт хэрэгцээтэй гэсэн бүхий л зүйлийг нийлүүлсээр иржээ. Б.Баттөгс 2009 онд “Orthopaedic Implants” хэ­мээх нэртэй багаж хэрэг­сэл болон протез ханган нийлүүлэх хувийн эмийн сан компанийг байгуулж өдгөө ч үйл  ажиллагаагаа явуулсаар байгаа ажээ.

Өөрийн ком­паниараа дам­­жуулан мэс засалд хэ­рэгтэй бүхий л төрлийн хэрэгслүүдийг ч ний­лүүлж байсан байна.

Түүний нийлүүлж байсан хэрэгслээс цухас дурдахад: Ясны хугарлын спиз, ясны татлага, тархины мэс заслын имплант, нурууны мэс заслын пластик шураг, мэс заслын гадна бэхэлгээ зэрэг эмнэлэгт нэн шаардлагатай гэсэн дээрх зүйлүүдийг сонгон шалгаруулалтгүйгээр албан тушаалаа ашиглан нийлүүлж байжээ. Энэ үйлдэл нь түүнийг ашиг сонирхолын зөрчилтэй нэгэн байсан гэдгийг эмнэлэгийн ихэнх ажилчид батлан хэлж байсан юм.

Энэ бүхнийг эсэргүүцсэн хэсэг эмч ажил­чид нь  түүнийг “Ашиг сонир­холын зөрчилтэй” хэ­мээн АТГ-т шалгуулахаар өгсөн байдаг. Энэ мэтээр тус эмнлэгт ажиллаж бай­гаа эрх мэдэл бүхий хү­мүүс эмнэлэгт тендер зар­ласан нэрээр зөвхөн өөрс­­­дийн хувийн бизнесээ явуулж халаасаа түн­тийлгэж бай­­сан аж.

Тиймээс л тэд ийнхүү өөрс­дийн ашиг хонжоогоо харж Ц.Энхбаярыг дарга болгохгүй гэж улайран тэм­цсэн гэдгийг эм­нэл­гийнхэн  хэлж байна. Түүнч­­­­лэн тэд өөрсдийн ашиг сонирхлоо гүйцэдүүлэхийн тулд мө­­рөөрөө ажлаа хийж явсан зарим нэгэн эмч сувилагч нарыг энэ бусармаг ажилдаа татан оролцуулсныг ажил хаялт зарласан хэсэг сувилагч ярьж байсан юм.

Энэ бүхнээс харахад аливаа байгууллагад тодор­хой албан тушаалд хэт удаан суусан нөхөд өөрсдийн хувийн бизнесээ өргөжүүлэх гэж улайрч байдгийн нэг жишээг тус эмнэлэгт болсон үйл явдал харууллаа.

Бидний олж авсан мэдээл­лээр бол хуучин дарга на­рынх нь “но” илрэх гээд байгаа тул шинэ даргыг амь тавих шахам эсэргүүцэж байгаа бололтой.

Түүнчлэн өдгөө тус эмэнэлгийн эргэн тойрон  дахь газар өнөөдөр хэний гараар орсноос болж өндөр өндөр барилгууд боссоныг ч шалгах хэрэгтэй гэдгийг ч ажилчид нь хэлж байна.

Тус эмнэлгийн хуучин удирд­лагууд эмнэлгийнхээ тө­лөө биш өөрсдийн ашиг сонир­холын үүднээс ийнхүү ажилчдаа  турхирах болсон нь Эрүүл мэндийн салбарт амь бөхтэй оршиж байгаа нэгэн дутагдал гэдгийг нотоллоо.

Энэхүү асуудал хуу­лийнхны хараанд өртөхгүй байх учиргүй бөгөөд ГССҮТ-ийн тендерийн хо­роог шалгаж эмч ажилчдын хэлж ярьсан зүйл нь хэр үнэний ортой эсэхийг нягтлах нь мэдээж.