Ш.Түмэнцэцэг Азийн наадмаас мөнгөн медаль хүртлээ

Индонез Улсад зохион байгуулагдаж буй Азийн зуны спортын XVIII наадмын чөлөөт бөхийн эмэгтэйчүүдийн 68 кг-ын жинд Азийн АШТ-ий хошой мөнгө, хошой хүрэл, залуучуудын Азийн АШТ-ий мөнгө, Иван Ярыгиний “Алтан Гранпри”-гийн гурван хүрэл медальт, “Монголиа Опен” ОУТ-ий гурав, улсын дөрвөн удаагийн аварга “Хилчин” спорт хорооны тамирчин ОУХМ Шархүүгийн Түмэнцэцэг өчигдөр БНХАУ-ын тамирчин Жоу Фэнтэй алтын төлөө барилдсан ч 4:1-ийн харьцаатай оноогоор ялагдаж мөнгөн медаль хүртлээ.

Мөн өчигдөр барилдсан эмэгтэйчүүдийн 76 кг-д гавьяат тамирчин Очирбатын Насанбурмаа хүрэл медалийн төлөө Киргизийн тамирчин Медэт Кызы Айперитай хүч үзэж 2:4-ийн харьцаатай оноогоор ялагдлаа.

 Монголын баг тамирчид 2 алт, 1 мөнгө, 4 хүрэл нийт 7 медальтайгаар Азийн наадамд амжилтаараа 9 дүгээр байранд жагссан хэвээр байна.