Өглөө.мн Шинэ өглөө, Шинэ мэдээлэл
Монгол Улсын төрийн шагналт, урлагийн гавьяат зүтгэлтэн,”Чингис хаан” одонт хөгжмийн зохиолч Б.Шаравын нэрэмжит “Сэрсэн тал” дуу хөгжмийн наадам Хэнтий аймгийн Жаргалтхаан суманд болж өндөрлөлөө. Уг наадмын орчин үеийн дуу дуулаачдын уралдаанд мэргэжлийн урлагийн театр, чуулгын 42 залуу авьяастан хоолойн чадлаа сорьсон байна.
Орчин үеийн дуу дуулаачдын уралдааны тэргүүн байрт ДБЭТ-ын гоцлол дуучин Монгол Улсын соёлын тэргүүний ажилтан С.Бат-Эрдэнэ, хоёрдугаар байрт ДБЭТ-ын гоцлол дуучин Монгол Улсын соёлын тэргүүний ажилтан О.Хүрэлбаатар, ДБЭТ-ын гоцлол дуучин Э.Отгонбат, гуравдугаар байрт ДБЭТ-ын дуучин Н.Чулуунхүү, Цагдаагийн “Сүлд” чуулгын дуучин Г.Ганшагай, Үндэсний урлагийн их театрын дуучин П.Баярмагнай нар тус тус шалгарчээ.
Харин тусгай байрт ДБЭТ-ын гоцлол дуучин Монгол Улсын соёлын тэргүүний ажилтан Б.Гомбо-Очир, ДБЭТ-ын гоцлол дуучин Г.Энхнаран, ЦДБЭЧ-ын дуучин Г.Мөнхбат, “Хан Хэнтий” чуулгын дуучин Е.Ганзолбоо нар шалгарсан байна. Мөн шилдэг концертмейстрээр Монгол Улсын гавьяат жүжигчин Б.Солонго шалгарчээ.
Хөгжмийн наадмын үеэр Жаргалтхаан сумын удирдлагууд Монгол Улсын төрийн шагналт, урлагийн гавъяат зүтгэлтэн, “Чингис хаан” одонт хөгжмийн зохиолч Бямбасүрэнгийн Шаравт зориулан 0,2 га өмчлөлийн газар бүхий 64 м.кв талбайтай уран бүтээлийн гэр урланг байгуулснаа албан ёсоор нээлээ. Урлангийн өрөөний тохижилтыг УИХ-ын гишүүн, УБ хот дахь нутгийн зөвлөлийн дарга Л.Оюун-Эрдэнийн зүгээс өөрийн хөрөнгөөр хийж гүйцэтгэжээ.
Урлангийн нээлтийн үйл ажиллагаанд Сумын Засаг дарга, Аймгийн ИТХ-ын төлөөлөгч Б.Цогт-Орших, ИТХ-ын дарга Ц.Цогбат, УИХ-ын гишүүн, МУ-ын Хөдөлмөрийн баатар Б.Бат-Эрдэнэ, УИХ-ын гишүүн Л.Оюун-Эрдэнийн бие төлөөлөгч Л.Намуунгэрэл, УБ хот дахь Хэнтий аймгийн нутгийн зөвлөлийн дэд дарга Б.Цогтбаатар, М.Батбаяр, МУ-ын Хөдөлмөрийн баатар, МУАЖ Зууны манлай дуурийн дуучин Н.Уртнасан, МУАЖ Н.Жанцанноров МУАЖ Ч.Шархүүхэн, МУАЖ А.Долгор, МУГЖ О.Ичинхорлоо, МУГЖ Г.Эрдэнэбат, МУГЖ Ц.Түвшинтөгс, Үндэсний Урлагийн Их Театрын Ерөнхий удирдаач МУУГЗ Н.Буянбаатар, МУСГЗ, яруу найрагч Ж.Саруулбуян, МУСГЗ, яруу найрагч Ү.Хүрэлбаатар, МУСГЗ хөгжим судлаач Ч.Буянхишиг нарын хүндэт зочид оролцлоо.
