Өглөө.мн Шинэ өглөө, Шинэ мэдээлэл
Монгол, Япон Улсын хооронд дипломат харилцаа тогтоосны 46 жилийн ой өнөө жил тохиож буй. Монгол Улсад ардчилал, шинэчлэл өрнөж, зах зээлийн эдийн засгийн тогтолцоонд шилжсэн 1990-ээд оноос хоёр улсын харилцаа эрчимтэй хөгжиж ирсэн. Япон Улсын Засгийн газар 1991-2013 он хүртэлх хугацаанд Монгол Улсад нийтдээ 102.3 тэрбум иенийн буцалтгүй тусламж, 77.3 тэрбум иенийн хөнгөлөлттэй зээл, 36.5 тэрбум иенийн Техникийн хамтын ажиллагааны тусламж үзүүлжээ. Хоёр орны харилцаа, хамтын ажиллагаа 1997 оноос “Иж бүрэн түншлэл”-ийн зарчимд тулгуурлан хөгжиж, харилцааны хүрээ өргөжин тэлсээр өнөөдрийг хүрчээ.
Тэгвэл хоёр улсын бизнес эрхлэгчдийг өөр хооронд нь танилцуулах, үйл ажиллагааг нь харилцан сурталчлах, хамтын ажиллагааг нь эрчимжүүлэх зорилго бүхий “Монгол-Хоккайдогийн бизнес форум” өнөөдөр /2018.09.17/ боллоо.
Форумд УИХ-ын гишүүн, Монгол-Хоккайдогийн эдийн засгийн харилцааг дэмжих нийгэмлэгийн тэргүүн Л.Болд, Гадаад харилцааны дэд сайд Б.Батцэцэг, Хоккайдо-Монголын эдийн засгийн харилцааг дэмжих нийгэмлэгийн тэргүүн Такэббэ Цүтомү, Япон улсаас Монголд суугаа Бүрэн эрхэт элчин сайд асан Шимүзү Такэнори, нийслэлийн ИТХ-ын Тэргүүлэгчдийн нарийн бичгийн дарга бөгөөд Ажлын албаны дарга Б.Батбямба нарын албаны хүмүүс болон Монгол, Япон улсад бизнес эрхлэгчдийн төлөөлөл оролцлоо. Японы Хоккайдо мужид үйл ажиллагаа явуулдаг бизнесийн байгууллага, компаниудын төлөөлөл оролцож, барилга угсралт, хөдөө аж ахуй, архетиктур дизайн, дулаан хангамжийн салбарт хэрэгжүүлэх төсөл хөтөлбөрүүдийг танилцуулсан юм. Тэдгээр нь цаг агаарын эрс, тэс уур амьсалтай Монгол орны нөхцөлд тохирох давуу талтай байв.
Форумын үеэр нийслэлийн ИТХ-ын Тэргүүлэгчдийн нарийн бичгийн дарга бөгөөд Ажлын албаны дарга Б.Батбямба“Нийслэлийн хөрөнгө оруулалт, бүтээн байгуулалт-2018” сэдвээр илтгэл хэлэлцүүллээ. Тэрбээр илтгэлдээ “Улаанбаатар хот Хоккайдо мужтай эртний харилцаатай. 1997 онд Япон улсын Саппоро хотод зохион байгуулсан Өвлийн хотуудын уулзалтад Улаанбаатар хот оролцож, гишүүнээр элссэн. Түүнээс хойш Хоккайдо мужтай олон чиглэлээр хамтран ажиллалаа. Жайка байгууллагын төсөл, хөтөлбөрийн хүрээнд сургууль, цэцэрлэгийн барилгыг өргөтгөн, дулаалж, төрийн үйлчилгээг нийгэмд хүргэх бааз суурийг бэхжүүллээ. Мөн нийслэлийн ногоон байгууламжийг нэмэгдүүлэхэд тус байгууллага багагүй дэмжлэг үзүүлсэн.
Нийслэлийн хоёр дох төвийг Яармагт байгуулах, Налайх дүүрэгт барьж буй Барилгын материалын үйлдвэр технологийн паркийн бүтээн байгуулалтын ажлыг нийслэлээс эхлүүлээд байна. Татварын болон бусад хөнгөлөлт үзүүлэх зарчмаар аж ахуйн нэгжүүдийг Барилгын материалын үйлдвэр технологийн паркад төвлөрүүлэхээр тооцсон. Паркийн эхний ээлжийн үйлдвэрийг ашиглалтад оруулна. Уг бүтээн байгуулалтад хөрөнгө оруулж, хамтран ажиллах боломж хэн бүхэнд нээлттэй.
Гэр хорооллыг дахин барилгажуулж, агаар, хөрсний бохирдлыг бууруулах нь бидний том зорилгын нэг. Өнөөдрийн байдлаар 210 мянга гаруй өрх гэр хороололд амьдарч байна гэсэн статистик бий. Яндангийн тоог бууруулж, Улаанбаатарыг орчин үеийн хот болгохоор ажиллаж буй. Ингэхдээ шахмал түлшний үйлдвэр барих, дулааны алдагдлыг бууруулах ажил санаачилж буй. Уурын зуухыг цахилгаан халаагуур солих гэх мэт арга хэмжээ авч байна. Мөн аялал, жуулчлалыг хөгжүүлэхээр хэд хэдэн төсөл, хөтөлбөр хэрэгжүүлж байгааг онцолсон. Энэ бүгдэд Япон улсын төлөөлөгчид гар, бие оролцож буйг хэлэхэд таатай байна” гэсэн юм.
Эх сурвалж: citycouncil.mn
