Дэлхийн оюутны өвлийн наадамд оролцох тамирчдыг үдэн гаргах ёслол боллоо

ОХУ-ын Красноярск хотноо 3 дугаар сарын 02-12-ны хооронд Дэлхийн оюутны спортын өвлийн XXIX Универсиад наадам зохиогдох гэж байна.
Уг наадамд спортын 11 төрлөөр 60 орны 3500 гаруй төлөөлөгчид оролцоно. Манай улсаас цана, шорт трейк, уран гулгалт, фристайлын спортын төрөлд 16 тамирчин, зургаан дасгалжуулагч, албаны дөрөв нийт 26 хүний бүрэлдэхүүнтэй оролцохоор бэлтгэлээ хангаад байна.
Өнөөдөр наадамд оролцох тамирчдыг үдэн гаргах ёслол Спортын төв ордонд болж БСШУСЯ-ны Төрийн нарийн бичгийн дарга Б.Баярсайхан, ОХУ-аас Монгол улсад суугаа ЭСЯ-ны 1 дүгээр нарийн бичгийн дарга М.В.Джеваков, БТСГ-ын дарга Ц.Шаравжамц, МОСХ-ны Ерөнхий нарийн бичгийн дарга Д.Жаргалсайхан нарын албаныхан үг хэлж, амжилт хүслээ.

Ёслолын үеэр баг тамирчид тангараг өргөж, БТСГ, МОСХ-ноос бэлтгэсэн Испаний “КЕЛМЕ” брендийн найм нь иж бүрдэл хувцсыг захиалан хийлгэснээ гардуулан өглөө. Тамирчдад Монгол улсын төрийн далбааг БСШУСЯ-ны Төрийн нарийн бичгийн дарга Б.Баярсайхан багийн тугч цанын тамирчин, ОУХМ Б.Ачбадрахад гардуулан өгч амжилт хүслээ.

Өвлийн Универсиад наадамд Монголын баг тамирчид анх 1991 оны Японы Саппоро хотноо болсон тэмцээнд оролцож байсан түүхтэй. Түүнээс хойш Монголын оюутан тамирчид 14 дэх удаагаа өвлийн Универсиад наадамд хүчээ сорьж байна. Монголын тамирчид Универсиадаас медаль авч чадаагүй ч гэсэн дэлхийн орнуудтай адил энэхүү том наадамдаа тамирчдаа бэлтгэн оролцуулах, тамирчид хувийн амжилтаа ахиулах, олимпийн оноогоо нэмэх зорилготой оролцож байна.

Энэ удаагийн наадмаас эхлэн Монголчууд анх удаагаа уран гулгалт, цанын орон зай баримжаалах спорт, фристайлын төрлүүдэд оролцоно.