“ДЭЛХИЙН МОНГОЛ ХҮН” нэртэй лааны тосон музей байгуулна

2013 оны 10 сар 15 / 11 цаг 18 минут Монгол уламжлал, бахархал

ТОВЧ ТАНИЛЦУУЛГА:

Монгол түмний дундаас оюун ухаан, авьяас билэг, эр зоригоороо тодрон гарсан түүхэн хүмүүсээ дэлхий дахинд сурталчилан таниулах зорилгоор Монгол улсын нийслэл Улаанбаатар хотын төвд, Жуулчны гудамжинд “ДЭЛХИЙН МОНГОЛ ХҮН” нэртэй гадаад дотоодын жуулчдад зориулсан лааны тосон музей байгуулна.

Монгол улсад ажил хэрэг, аялал жуулчлал, дамжин өнгөрөх зорилгоор зорчиж буй гадаадын жуулчид болон дотоодын жуулчид хамгийн түрүүнд очиж үзэн, аялал жуулчлалтай холбоотой бүх төрлийн үйлчилгээг нэг дороос авах Аялал Жуулчлалын Төвийг энэхүү музейн орчинд бий болгоно.

ШАЛГУУР: Музейн шалгуурыг Дэлхийд нэрээ гаргасан Монгол хүн хангана.

ХЭРЭГЦЭЭ, ШААРДЛАГА, ШИЙДЭЛ:

Улаанбаатар хотын төвд бидний нэрлэж заншсанаар “Урт цагаан” буюу Нийслэлийн өмчийн III байр эзэнгүйдэж, өмнөх талбай нь Жуулчдын гудамж хэмээн нэрлэгдсэн ч автомашины зогсоол болсон. Гэтэл энэ байрлал нь УБ хотын аялал жуулчлалын менежментийг маш оновчтой зохион байгуулж хөгжүүлэх боломжтой хамгийн тохиромжтой стратегийн байршил юм.

Энэ нь жуулчдын хамгийн их зочилдог Улсын Их Дэлгүүр (урд), Урлагийн музей (зүүн), Динозаврын музей (хойд), Гандантэгчилэн хийд(баруун) зэрэг байршлуудын яг төвд оршдог, аялал жуулчлалын төв болгох цорын ганц боломж юм.

Энэ төслөөрөө бид хотын архитектурыг эвдэхгүй, замын хөдөлгөөний төлөвлөлтийг хөндөхгүйгээр үндэсний хэв шинжийг агуулсан, суурь архитектурыг хадгалсан шийдлээр барилгыг засах эсвэл шинээр барьж аялал жуулчлалын цогцолборыг бий болгоно.

ҮР ДҮН, АЧ ХОЛБОГДОЛ:

Нүүдэлчин соёл иргэншлийн улмаас өвлөгдөөгүй түүхэн хүмүүсийн дүр төрхийг ард түмэнд бодитоор нь хүргэж үндэсний бахархлыг дээшлүүлнэ.

Монголыг дэлхийд дуурсгасан алдартнуудын бодит дүр төрхийг үзэх, түүхтэй нь танилцах, зургаа авахуулах хүсэл гадны жуулчдад төдийгүй монгол хүн бүрт төрнө. Энэ нь бүх Монголчуудад монгол хүн хэр чадвартайг сануулж, бид ч гэсэн боломжтой гэсэн өөдрөг үзэл, бахархлыг төрүүлнэ.

Дэлхий нийт зөвхөн Чингис хаанаар Монголыг төсөөлдөг бол энэ музейгээс бусад Дэлхийн Монгол хүмүүсийг таньж мэдэх ач холбогдолтой.

Монгол хүн оюун ухаан, авьяас чадвар, хүний хөгжлөөрөө дэлхийн түвшинд хүрэх эрмэлзэлийг өдөөж бадраана.

Аялал жуулчлалын бүтээгдэхүүн үйлчилгээ нэмэгдэж, гадаад дотоодын жуулчдын тоо өсөх нөхцлийг бүрдүүлснээр салбарын хөгжилд бодитой хувь нэмэр оруулна.

Монгол урчуудын гараар бүтээгдсэн Монголын соёлын өв нэмэгдэнэ.

Түүхэн бодит хүмүүсийг цаг үе, ахуй соёлтой нь бүтээх замаар үндэсний түүх соёлыг сурталчилна.

Үндэсний үйлдвэрлэгчид, гар урлаачдыг дэмжих том зах зээлийг бий болгоно.

УБ хот дэлхийн том хотуудын жишгээр оддын гудамж, жуулчдын нэгдсэн төвтэй болно.

УРИЛГА: Монголоо гэсэн сэтгэлтэй хүн бүрт бидэнтэй хамтран ажиллах боломж нээлттэй.

МЭЙЛ ХАЯГ:info@starsoft.mn