Өглөө.мн Шинэ өглөө, Шинэ мэдээлэл
Жюү жицүгийн өсвөр үе, насанд хүрэгчдийн дэлхийн аварга шалгаруулах тэмцээн Арабын нэгдсэн Эмират улсын Абу Даби хотод энэ сарын 20-ноос 26-ны өдрүүдэд болно. 11 дэх удаагийн ДАШТ-д оролцох Монголын багийг үдэх арга хэмжээ өчигдөр /2019.04.17/Олимпийн хорооны байранд боллоо.
Монголын багийн бүрэлдэхүүнд өсвөрийн багийн ахлагчаар Монголын жюү жицүгийн холбооны дэд ерөнхийлөгч Д.Бадрах, насанд хүрэгчдийн багийн ахлагчаар С.Жавхлан нар томилогдсон байна. Мөн мастерс ангилалд оролцох тамирчин багтсан бөгөөд нийтдээ 55 тамирчин Абу Даби хотыг зорьж байна.
Арабын Нэгдсэн Эмират улс жюү жицүгийн спортыг өндөр түвшинд хөгжүүлж ирсэн бөгөөд жил бүр томоохон фестиваль зохион байгуулдаг байна. Энэ жилийн арга хэмжээ дөрөвдүгээр сарын 27-нд болохоор төлөвлөгджээ.
2018 онд Монголын жюү жицүгийн баг тамирчид олон улсын тэмцээнд өндөр амжилт үзүүлж, нийтдээ 199 медаль авсан байна. Тэдний дунд өсвөрийн 27 тамирчин ДАШТ-ээс бүгд медальтай ирсэн бахдам амжилт үзүүлжээ.
