Өглөө.мн Шинэ өглөө, Шинэ мэдээлэл
Арабын нэгдсэн Эмират улсын Фужирах хотноо жүдо бөхийн Ази, номхон далайн бүсийн аварга шалгаруулах тэмцэээн хоёрдахь өдрөө үргэлжлэн явагдаж байна.
Эхний 2 өдрийн байдлаар манай улсын шигшээ баг 2 алт, 2 мөнгө, 3 хүрэл медальтай, нийт 7 медальтай тэмцээнийг тэргүүлж байна. Тэмцээний эхний өдөр эмэгтэйчүүдийн 48 кг, 52 кг, 57 кг, эрэгтэйчүүдийн 60 кг, 66 кг жингийн барилдаанууд явагдаж дөрвөн бөх медаль хүртлээ.
Эмэгтэйчүүдийн 52 кг-ийн жинд Л.Сосорбарам мөнгө, 57 кг-д Л.Энхрийлэн хүрэл, эрэгтэйчүүдийн 60 кг-ийн жинд Э.Ариунболд хүрэл, 66 кг-д Ё.Басхүү хүрэл медаль авсан юм.
Харин тэмцээний хоёр дахь өдөр эмэгтэйчүүдийн 63 кг, 70 кг, эрэгтэйчүүдийн 73 кг, 81 кг жингийн барилдаанууд явагдаж, манай гурван бөх алтан медалийн төлөө барилдаж, 2 нь Азийн аварга боллоо. Эмэгтэйчүүдийн 63 кг жинд барилдсан Б.Ганхайч эхний тойрогт гоц мөргөөд хоёрдугаар тойрогт Бахрейны Солтани Рим, хэсгийн аваргын төлөө Казахстаны Бердибекова Иолантаг давсан. Хагас шигшээд БНХАУ-ын жүдоч Тан Жинийг давсан ч аваргын төлөө БНХАУ-ын Ян Жунхиад ялагдаж, мөнгөн медаль хүртсэн.
Эрэгтэйчүүдийн 73 кг жингийн С хэсгийг тэргүүлэн барилдсан Ц.Цогтбаатар дэлхийн аваргыг ялж, алтан медаль хүртлээ. Мөн эрэгтэйчүүдийн 81кг жинд О.Ууганбаатар Узбекстаны Ш.Болтабоевыг ялж Азийн аварга боллоо.
