Өглөө.мн Шинэ өглөө, Шинэ мэдээлэл
Монголын хөлбөмбөгийн Үндэсний шигшээ багийн дасгалжуулагчаар 2017 оны 3-р сараас эхлэн ажилласан Германы мэргэжилтэн Ханс Майкл Вайсс гурван жилийн дараа ажлаа хүлээлгэн өглөө. Монголын Хөлбөмбөгийн Холбоо герман мэргэжилтэнтэй нэг жилийн хугацаанд эхний гэрээг хийсэн юм.
2017 – 2018 онд тэрбээр Үндэсний шигшээ багийг удирдан 11 тоглолтод оролцсон бөгөөд түүний удирдлага дор Үндэсний шигшээ баг түүхэндээ анх удаа Зүүн Азийн АШТ-ий урьдчилсан шатны эхний давааг амжилттай давсан. Цаашлаад Тайвань улсад болсон 2-р шатанд БНАСАУ, Тайвань, Хонконг гэсэн хүчтэй багуудтай тулж өрсөлдөөнтэй тоглолтыг үзүүлсэн юм.
Үндэсний шигшээ багийн үзүүлсэн энэхүү амжилтад үндэслэн Монголын Хөлбөмбөгийн Холбоо Герман мэргэжилтний гэрээг дахин нэг жилээр сунгасан. Энэ шийдвэр ч нүдээ олж, бид “Катар – 2020” хөлбөмбөгийн ДАШТ-ий эхний шатад Бруней улстай учраа таарч, хоёр тоглолтын нийлбэр 3:2-ын харьцаагаар цааш шалгарсан. Япон, Киргиз, Тажикстан, Мьянмарын шигшээ багуудтай нэг хэсэгт хуваарилагдан зургаан тоглолтыг хийн, энэ шатны анхны хожлоо авсан билээ.
Дасгалжуулагч Майкл Вайссын удирдлага дор Үндэсний шигшээ баг албан ёсны 19 тоглолтыг хийж, Макао, Мьянмар, Умард Марианы Арлууд, Бруней, Лаос зэрэг улсуудыг буулган авч, Япон, Киргиз, Тажикстан зэрэг чансаа дээгүүр багуудтай эн тэнцүү өрсөлдөөнийг үзүүлж, Монгол залуус Азийн аль ч багийн эсрэг хүчтэй өрсөлдөөн үзүүлж чадахаар болсныг хамтдаа харлаа.
Монголын Хөлбөмбөгийн Холбооны ерөнхийлөгч А.Ганбаатар болон ерөнхий нарийн бичгийн дарга Ө.Шижир нар түүнийг хүлээн авч уулзан цаашдын амьдрал, ажил үйлст амжилт хүсэхийн сацуу Монголын хөлбөмбөгт түүний оруулсан хувь нэмрийг өндөрөөр үнэлж, МХБХ-ны “Гавьяаны одон”-гоор шагналаа гэж Монголын хөлбөмбөгийн холбооноос мэдээллээ.
