Өглөө.мн Шинэ өглөө, Шинэ мэдээлэл
Засгийн газрын хуралдаанаас гаргасан зарим шийдвэрийг Монгол Улсын Шадар сайд Я.Содбаатар танилцууллаа.
Тэрбээр “Хүйтний эрч чангарч, цас унаснаас болж зарим аймгуудад өвөлжилт хүндэрсэн нөхцөл байдалтай байна. Иймд Засгийн газрын гишүүдэд нөхцөл байдлыг дүгнэн танилцуулж, малчдад чиглэсэн багц арга хэмжээг өнөөдрийн хуралдаанаар гаргалаа.
Намраас хойш улсын хэмжээнд зудын эрсдэлийн үнэлгээ хийсэн. 10 аймгийн 72 суманд өвөлжилт хүндрэх эрсдэлтэй байна. Үүн дотор Баянхонгор аймаг хамгийн эрсдэлтэй байгаа. Оторт явж байгаа нийт малчдад дэмжлэг үзүүлэхээр боллоо. Улсын нөөцөөс 3,800 тонн өвс, 1,900 тонн тэжээлийг малчдад үнэгүй олгох ажлыг эхлүүлэхээр болсон юм.
Өвөлжилт нэн хүндрэлтэй байгаа Баянхонгор, Өвөрхангай, Дундговь аймгийн бүх сумдад хүндэвтэр байгаа Говь-Алтай, Өмнөговь аймгийн зарим сумдад отроор явж байгаа малчдад зориулж, Хүнс, хөдөө аж ахуй, хөнгөн үйлдвэрийн яамны дэргэд хэрэгжиж байгаа Дэлхийн банкны Мал аж ахуйн эдийн засгийн эргэлтийг нэмэгдүүлэх төслөөс 5 сая ам.долларын буцалтгүй тусламжийг үзүүлэхээр боллоо.
Эдгээр аймгуудын 40 мянган малчин өрх энэ тусламжийг хүртэнэ. Тодорхой хэлбэл нэг өрхөд 300 мянган төгрөгийн үнийн дүн бүхий тэжээлээр хангахаар боллоо”гэж мэдэгдлээ.
