Өглөө.мн Шинэ өглөө, Шинэ мэдээлэл
“Токио-2020” олимпын наадмын хүндийг өргөлтийн тэмцээнийг Л.Одгэрэл шүүх томилолт өвөртөллөө.
Лхагвасүрэнгийн Одгэрэл нь 1982 оны зургадугаар сарын 14-нд Сүхбаатар аймгийн Баруун-Урт хотод төрсөн. “Их шавь” БТДС-ийг багш, Бээжин хотын БТДС-ийг хүндийг өргөлтийн дасгалжуулагчийн мэргэжлээр тус тус дүүргэсэн. Эмэгтэй туйванчдаас “Чинхуандао-2013” Азийн АШТ-ээс хамгийн анхны тивийн мөнгөн медаль хүртэж, 2012 онд олон улсын шүүгчийн болзол биелүүлсэн. Л.Одгэрэл нь ДАШТ-д шүүгчээр 7 удаа уригдаж, Тяньжинь-2013 Зүүн Азийн наадам, Тайпей-2017 Универсиад, Жакарта-2018 Азийн наадам, Буэнос-Айрес-2018 Залуучуудын олимпын наадмыг шүүсэн.
Тэрбээр Монголын хүндийг өргөлтийн спортын түүхэнд олимпын наадамд шүүгчээр томилогдсон анхдагч эмэгтэйгээр тодорлоо. Афин-1896 анхны олимпоос гараагаа эхлэн, 29 удаа албан ёсны хөтөлбөрт багтсан хүндийг өргөлтийн спорт нь 2021 оны долдугаар сарын 24-нөөс наймдугаар сарын 4-ний өдрүүдэд “International Forum” ордонд зохиогдох бөгөөд манай туйванчид нийт найман удаа олимпод оролцсон түүхтэй.
