Б.Ууганбаяр: Хязгаарлалтын дэглэм тогтоох саналыг ЭМЯ-наас гаргасан

2021 оны 3 сар 31 / 11 цаг 58 минут Нийгэм, Онцолсон

Коронавируст халдвар (covid-19)-ын нөхцөл байдлын /2021.03.31/ 11:00 цагийн нэгдсэн мэдээллийн үеэр ЭМЯ-ны хэвлэлийн төлөөлөгч Б.Ууганбаяр мэдээлэл хийлээ.

ЭМЯ-ны хэвлэлийн төлөөлөгч Б.Ууганбаяр“Коронавирусээс болж эмнэлгийн ачаалал өсвөл өөр өвчнөөр хүмүүс амиа алдах эрсдэл үүсэж болзошгүй. Тиймээс хязгаарлалтын дэглэм тогтоох саналыг ЭМЯ-наас гаргасан. Засгийн газар дөрөвдүгээр сарын 3-18-ны өдрүүдэд хөл хорио тогтоох эсэхийг шийдвэрлэхээр яг одоо хуралдаж байна. Эрүүл мэндийн яамнаас ч саналаа гаргасан.

Иргэд олон нийтийн дунд хэлэлцүүлгүүд өрнөөд эхэллээ. Хэрвээ хатуу хөл хорио тогтоохгүй бол өдөрт бүртгэгдэх өвчлөлийн тоо хэдэн мянгаар хэмжигдэх нөхцөл байдал үүсэж болзошгүй байна. Нөгөө талаас бид эрүүл мэндийн салбараа бодох ёстой.

Эрүүл мэндийн салбарыг бүхэлд нь “Ковид-19” өвчин рүү зүтгүүлэх үү эсвэл бусад эрсдэлийн харьцаагаа тооцох уу гэдэг бэрхшээл байгаа юм. Эрүүл мэндийн салбар үндсэн тусламж үйлчилгээг үзүүлэх ёстой. Ингэхийн тулд эмч ажилчдын нөөц бололцоонд тулгуурлах ёстой. Гэвч эмнэлгийн ажилчдын нөөц хязгаарлагдмал учраас тодорхой арга хэмжээ авахаас өөр аргагүй байна.

Монгол Улсын Засгийн газар эдийн засгаа бодож байгаа ч иргэдийн амь нас эрүүл мэндийг давхар бодох ёстой. Ийм учраас Засгийн газрын шийдвэрийг хүндэтгэж эерэгээр хандахыг уриалж байна.

Нөгөө талаас та бүхний дэмжлэг олон хүний амь насыг аврах боломжийг нээх юм шүү. “Ковид-19”-өөр өвчилсөн хүмүүсээ бүх эмнэлэгтээ аваад эхэлбэл бусад өвчнөөр амь насаа алдах нөхцөл байдал үүсэж болзошгүй учраас үүн дээр учиртай бодох зайлшгүй шаардлага байна”гэв.

Б.Ууганбаяр: Хязгаарлалтын дэглэм тогтоох саналыг ЭМЯ-наас гаргасан

Холбоотой мэдээ

Санал болгох мэдээ