Өглөө.мн Шинэ өглөө, Шинэ мэдээлэл
Узбекистаны Ташкент хотноо туялзуур сэлэмний Ази, далайн орнуудын олимпын эрхийн тэмцээн болж, манай улсаас эх орноо төлөөлөн ганцаараа оролцсон спортын мастер Батсайханы Амарзаяа хүрэл медаль хүртлээ.
Энэ жил 22 нас хүрч буй Б.Амарзаяа нь туялзуур сэлэмний төрлөөр тивийн тэмцээнүүдээс хамгийн өндөр амжилтыг үзүүлж, урьдчилсан шатанд 3 ялж, 3 ялагдсанаар хасагдах шатанд долдугаар байраар шалгаран өрсөлдсөн юм.
Тэрбээр Филиппиний Ханиел Абеллаг 15:3-аар илт илүүрхсэн бол медалийн төлөө хэсэгтээ нэг ч ялагдаагүй Вьетнамын Нгуен Пон Кимийг 15:14-өөр ялсан. Гэвч хагас шигшээд Казахстаны Ултьяна Благанскаяатай тулалдаж эцсийн мөчид 15:14-өөр ялагдал хүлээлээ.
Аваргын төлөө Сингапурын Кириа Тикана Абдул Рахман Казахстаны У.Благанскаяаг 15:12-оор ялснаар алтан медаль, олимпын цорын ганц эрхийг авлаа. Харин манай тамирчинтай хамт Тайландын Кораван Тани хүрэл медалийн болзол хангажээ.
