Боксчин С.Шинэбаяр Манчестер хотод өөрийн клубээ нээжээ

Боксын спортод 26 жилийн турш хүч хөдөлмөрөө зарцуулаад буй Их Британийн 49,1-50,8 кг-ын жингийн аварга боксчин С.Шинэбаяр Манчестер хотын Стокпорт дүүрэгт өөрийн боксын клубээ нээсэн байна.

Клубын нээлтэд Их Британи болон Европын 59,01-61,2 кг-ын жингийн аварга Жонн Мури, Дэлхийн боксын нийгэмлэгийн 52,3- 53,5 кг-ын жингийн аварга Скот Кувиг нар хүрэлцэн ирсэн бөгөөд түүний менежерээр олон жил хамтарч ажилласан “англи аав” Жак Доутиг нь С.Шинэбаяртай хамт хамт ёслолын туузаа хайчлан клубийнхээ үүдийг албан ёсоор нээжээ.  Мөн нээлтийн үеэр клубийн гишүүн боксчид дасгал сургуулилт хэрхэн хийдгээ хүмүүст үзүүлэх сургууль хийсэн байна.

С.Шинэбаяр нь саяхнаас дасгалжуулагч хийх эрхээ авсан тул өөрийн сурч мэдсэн зүйлээ дараагийн залуу үед залгамжлан үлдээхээр шийдэж эл клубээ нээсэн аж. Түүний клуб дан ганц боксын бэлтгэл сургуулилт зааж сургахгүй бөгөөд зөв хооллох, илүү жингээ хасах хүсэлтэй хүмүүст ч зөвлөгөө өгч, дасгал сургуулилт хийлгэх юм байна.